噚晚係中原地產周年餐舞會，除咗中原嘅員工，多家發展商好友都應邀出席，至於大家最期待嘅可能係當晚表演嘉賓，剛演出劇集談判專家嘅小生張智霖。
蘭西見到出席嘅發展商好友，每位都悉心打扮。電訊盈科兩位女當家顏金施、史慕蘭、華人置業集團大劉身邊紅人凌緣庭、啱啱加入信和置業嘅營業副總經理韓家輝、新地雷霆、九倉黃光耀、華懋吳崇武、嘉華地產呂耀華、德士活余少洋等，都是座上客。
見到咁多發展商好友，蘭西第一時間上前問吓佢哋公司最新動向。余少洋話，今年係佢哋公司吸納（土儲）期，會將手上地皮改用途，又會增加優質地皮嘅數量。
吳崇武就透露，集團可能會繼續將舊工廈改用途，又話房委會將紅磡紅灣半島出售嘅機會好微，反而新世界回購嘅機會最大。
講吓講吓，吳崇武話係時候要走，點解？佢話要返屋企睇《戇夫成龍》喎！
農曆新年臨近，蘭西收到發展商送嚟嘅利是封，有香港興業、九龍建業同太古地產。九龍建業嘅比較傳統，用咗一副對聯做封面。另兩間發展商就乘機用埋利是封嚟宣傳樓盤。
香港興業主力宣傳東涌藍天海岸。太古更多樣化，住宅盤點少得將軍澳維景灣畔，封面好似同舊年一樣，都係用趣致嘅小朋友做封面，其他係旗下三個大型商場，包括鰂魚涌太古城中心、金鐘太古廣場同又一村又一城。
蘭西諗，若果發展商送利是封畀樓盤買家、業主同埋睇樓人士，佢哋派利是時，就變相同佢個盤做免費宣傳，咁咪重更加一舉兩得。
政府將賭波規範化，最受惠莫過於酒吧，因為多咗班賭波球迷幫趁，有「澳門李嘉誠」之稱嘅柯為湘，旗下九龍建業亦把握呢個商機，準備喺尖東新文華中心搞「尖東酒吧街」。
九建去年買新文華中心一樓大部份舖位，約四萬九千呎，九建市務及銷售總經理羅汝榮同蘭西講，𠵱家嗰度已經有四間酒吧，集團會攞百幾萬包裝一吓，估計上半年可以成事。羅汝榮話，佢哋嘅對象係草根階層，所以唔會同棉登徑同諾士佛臺兩個新興蒲點競爭。
政府當年想將尖東發展成商業同遊客區，但始終有心無力，若呢條專為「草根階層」而設嘅酒吧街成功，該區就會有另一番景象。
電盈薄扶林貝沙灣噚日舉行代理考試，據電盈基建營業及市務總監顏金施講，已經進行咗四輪考試，共有二千五百名代理參加，下個禮拜六有結果。今日可能有初步結果。
鴻運有八成前線員工出席，約二百人，港島豪宅高級區域經理關仲年話，公司租咗幾部旅遊巴士，喺考完試後載員工去貝沙灣實地考察，等員工對個盤更加熟悉，日後促銷時更有把握。
關仲年講，鴻運已經有五十幾個員工同啲客做緊軟銷嘅工作，初步反應唔錯。
地產代理監管局早排預計未來五年，每年都有六百萬到九百萬赤字，聽落認真唔掂，所以地監局要致力開源節流。開源方法係考慮向物業交易雙方開徵「物業交易費」。
據地監局最新年報披露，節流其中一個方案係現有寫字樓約滿後改為自置物業，喺較偏離市中心但就交通方便嘅地區買個約一萬呎嘅單位，連埋一切有關費用大約係二千二百萬，所需款項由累積儲備支付，咁地監局每年經常性開支，可以慳番嘅淨支出係三百萬。
不過，據江湖傳聞，地監局𠵱家到處搵緊寫字樓，但指定要地鐵沿線，面積就要萬五呎。以二千二百萬計，每呎約千五蚊，睇怕唔易搵到合適物業。
蘭西
電郵地址：
