可能日本地方真係大啲，差唔多個個藝人都有隻貓咪或者狗仔看門口。最近吉川日奈、藤原紀香同神田Uno等人，參加咗個寵物攝影比賽，同雜誌嘅讀者鬥一番。佢哋將自認幫心愛小狗小貓影得最靚嘅寫真，公開畀人品評吓，咁以我羅拉嘅眼光睇，紀香可以頒個「最有神髓獎」，而吉川幫狗仔扮靚就最叻。
最癡纏
紀香不嬲視佢隻貓Aisha如己出，因為回想八年前佢一個人離開鄉下到東京闖江湖嘅時候，身邊只有Aisha陪住佢，所以你見佢直頭將Aisha個樣印落個袋度，出外做嘢見唔到都可以有如影隨形喎，你話幾癡纏！而佢影Aisha嘅相似乎都有番咁上下功力，見得吓人。
最醒目
吉川有兩隻狗仔Rika同Pahika，佢影啲相好明顯係出自儍瓜機，水準就唔講得，但係見佢咁有心機親手造咗好多狗仔衫，愛狗搶鏡話咁易啦。
最百厭
神田Uno幫佢隻五歲嘅狗仔Rocket影嘅相，佢話隻狗好百厭，控制唔到喎，結果惟有抱實隻狗仔玩自拍，Rocket先肯乖乖哋咁影相。