毀約爭拗　愈爆愈大鑊
向太：朱永龍迫柏芝陪老細

朱永龍年前入稟控告張栢芝毀約，至今仍對簿公堂。朱永龍日前表示不會罷休，而昨日中國星老闆娘向太陳嵐則稱，當初朱永龍要正在開工的栢芝去陪老細，導致關係決裂。

中國星老闆娘向太陳嵐昨日接受本報電話訪問時強調，自己並沒有牽涉入張栢芝和朱永龍的官司，向太說：「當初朱永龍同張栢芝嘅父親，都想庭外和解，所以搵我做中間人。據我了解，當初喺合約期間，一日栢芝開工拍緊廣告，朱永龍突然叫佢走，話有一個老細級嘅人生日，要栢芝去陪佢哋唱卡拉OK。栢芝當時好驚，佢爸爸知道之後亦好唔開心，覺得個女點解做咗陪酒女郎咁。」

「之前啲約唔公平」
向太續說：「而且栢芝簽約時好細個，合約有好多不平等條款，栢芝爹哋為咗合約同朱永龍傾過，朱永龍亦都搵過我話想將栢芝嘅電影片約簽畀我，重話因為之前啲合約唔公平，想同栢芝簽過一份新約。本來約咗第二晚雙方坐低傾，但係朱永龍甩底冇嚟，之後話自己喺某人屋企唔走得，重話合約交咗畀某人，我了解過根本冇咁嘅事，佢借某人過橋，之後半年朱永龍冇搵過我。
「之前法庭判咗栢芝要將收入嘅百分之十二點五交畀法庭，由雙方律師監管，咁佢就可以自由接工作。最近朱永龍又主動搵我話想庭外和解，但我對佢已經無所適從，亦唔知點調停，佢喺人前扮驚、扮慘，但反轉豬肚又係另一個面目。我亦要澄清，我從來冇話過畀四百萬佢幫栢芝贖身，中國星只係同栢芝有片約，從來唔係佢嘅經理人，我只係見佢咁慘，出於auntie嘅角色幫佢啫。」

朱永龍：我冇迫佢
對於向太揚言以前栢芝在拍廣告期間，曾被朱永龍拉去唱K陪客，昨日朱永龍透過電話否認說：「冇啲咁嘅事，我從來冇迫佢做任何一件事，冇迫佢陪任何一個客或者迫佢接任何戲。只係有次我生日，我等栢芝拍完廣告之後，接佢去我嘅生日party，參加party嘅人係栢芝唱片公司同我間公司嘅人，佢全部都識嘅。」
問到當時栢芝是否不情願？朱永龍說：「佢應承咗落嚟㗎，係人都知佢爹哋係乜人，我點敢咁做呀？」朱永龍對於向太叫他去死一事則說：「我細路仔好驚㗎，死咗咁點呢？就算死咗，官司都要打㗎。」
此外，王晶名下馬匹的真心老友昨晚在快活谷馬場出賽，擔任王晶新戲《絕種好男人》男、女主角的任賢齊和張栢芝都有到場捧場，可惜真心老友鎩羽而回。