辦年貨：
60年老行尊七叔教你揀海味

過農曆新年，中國人一般都會去海味舖辦年貨，無論自己食或送禮，鮑參翅肚少不免。不過買海味呢家嘢只有老一輩人家至識揀，年輕一輩去辦貨一定揀到劣貨或俾人斬到一頸血，所以有老人家帶路必然最穩陣。今年大部份海味售價都大幅調低，且比去年更靚，小記除咗介紹邊樣最抵買外，更搵嚟上環兩間老字號嘅老闆教大家揀海味。
記者：梁煒健
攝影：黃叔榮、梁煒健
ImageGirl：Kay

湛江蝦米今年稱王
每斤售價：$70（同興泰記）
據七叔講，蝦米以泰國、中國及越南三個原產地最多最靚，以泰國蝦米最靚，但去年價錢稍貴，比中國蝦米約貴20％，約$86一斤。但今年中國出產嘅蝦米則比泰國更靚，價錢更平，其中以湛江蝦王最正斗，顏色夠金黃味道又香，大大隻賣每斤$70，用嚟煮餸最啱。至於汕頭今年出產嘅蝦米亦唔錯。

花膠要揀厚身淨色
巴西花膠每斤$320（同興泰記）
買花膠要揀啲厚身嘅，而且要注意花膠身係咪一片淨色，變咗色就唔係咁靚。最靚嘅花膠係巴基斯坦，但售價頗貴，一般每斤由$900至$1,600，且花膠愈大愈貴。巴西及肯雅則屬中等貨品，已經不俗，煲完後1斤可變3斤食用，其中較好嘅AAA級巴西花膠，每斤約$320。

泰國17吋魷魚乾
每斤售價：$80（同興泰記）
呢類大魷魚以泰國最靚，一般魷魚身長約17吋，售價較去年貴了少許，每隻魷魚約售$15，用嚟炭燒就最正。

形圓身厚日本吉品鮑最正
43頭日本吉品鮑每斤$3,500（同興泰記）
購買乾鮑魚，最緊要揀形圓身厚的，咁樣先叫做肥大有肉，而扁身嘅鮑魚就太瘦唔好食，食落冇乜口感。吉品鮑夠厚身，43頭每斤$3,500，現時鮑魚仔以日本橫濱出品嘅吉品鮑及麻鮑最靚。

日本元貝今年每斤平$100
每斤售價：$430（同興泰記）
江瑤柱又稱元貝，以日本北海道宗谷產地最靚。日本元貝較為高身味香，其他產地則較為扁身，味道不同。家陣日本元貝比上半年時每斤調低約$100，即現時中等貨色約每斤$430，去年則要賣$540一斤，一般用嚟煲湯或釀節瓜最啱。

日本魚翅貴得有價值
日本鈎翅每斤售價：$1,530（同興泰記）
聽落好笑，原來仍有好多人認為魚翅由美國嚟先至最正，所以乜都要話係金山出產先至有人買；其實美國近年只有好少量，而日本及非洲的才是最靚。日本翅身色澤較白，非洲的則針夠粗，而印尼、菲律賓及中國汕頭的就較劣。魚翅今年較去年貴咗約$200至$300一斤，如圖中嘅日本鈎翅就賣$1,530一斤，但仍然相當受歡迎。

七叔由後生到老闆
小記少接觸海味行業，自然要搵老行尊教路及分析海味行情；而稱得上老行尊嘅七叔，入行足有60年。原來七叔13歲已入行，由普通後生做到家陣嘅店舖大老闆，海味知識自然豐富；佢打理嘅「同興泰記」歷史亦悠久，先後在上環搬過三次舖，現址已有40年歷史，所以有唔少大酒樓集團都係佢哋嘅長期熟客仔。據七叔稱，海味行業係香港最悠長嘅行業，足有70年咁耐，而上環就係這個行業嘅起源地。佢又話雖然近年經濟差，但海味行業就一路都好平穩。

同興泰記海味
電話：25472522
地址：上環德輔道西178-180號地下


今年內地冬菇平30％
中等冬菇　每斤$58至$70（源生海味）
已做48年海味行業的梁先生，大讚今年內地生產的冬菇最靚，而產地多來自浙江一帶，中等貨售價由$58至$70一斤不等，而靚啲嘅冬菇都係賣$100一斤。對比去年中等貨賣成$80至$100一斤，明顯今年平咗30％，兼且菇味夠香十分好食。
梁生話，啲菇喺內地已經揀好晒，十分整齊，所以大家唔使再費時間去挑選。

日本蠔豉香滑抵食
（左）日本二級蠔豉 每斤$108
（中）日本三級蠔豉 每斤$90
（右）大陸蠔豉 每斤$60
（源生海味）
開年飯必煮嘅中國名菜「發財好市」，要髮菜之餘自然要買埋蠔豉，而今年最抵食，要算日本及南韓蠔豉，比去年足足平足三成。而日本二級蠔豉與三級蠔豉則蠔身較大隻兼柔軟甘香，比內地貨較佳。

罐頭靈芝菇煮齋一流
每罐800克售價：$25（源生海味）
由北京入口嘅靈芝菇罐頭，本身係野生十分有營養價值，所以即使入咗罐頭，仍然具有其益處，用佢嚟煮齋確一流。早年售價每罐要$40，現售價$25。

源生海味
電話：25486615
地址：上環德輔道西71號地下