美股周二晚持續下挫逾百點，但港股噚日只跌8點，恒指收報9560，成交62億元。據講有期指好友不甘被淡友力壓，所以入市頂住兩大國內電訊股，令港股跌幅由112點收窄至只有8點，睇嚟今個月期指結算，將有一番龍爭虎鬥。
電盈（008）突傳出可能重投本地流動通訊業務，市場隨即憧憬電盈可能收購SUNDAY（866），刺激股價勁升12.4%，收報0.181元，但成交只有292萬元。雖然電盈已否認會重投本港流動電話市場，不過電盈當時出售流動電話業務CSL予Telstra，主要是因為財政緊絀，而非睇淡本地流動通訊業務，即使真係睇淡，作為本地主要電訊商，真係冇理由完全撤出流動通訊市場，所以電盈收購SUNDAY並非冇可能，只在於時間及價錢。不過電盈受出售CSL之協議所限，明年初才可重投本地流動電話市場，咁快就炒SUNDAY，風險相當高。
利亞零售（8052）大股東馮氏家族突然減持9340萬股，相當於14%股權，每股作價2元，套現1.87億元。黑客話，利亞本地零售業務前景一般，國內發展暫時只是一個概念，加上馮氏家族持股量逾70%偏高，所以減持並唔奇。值得留意係馮氏家族套現後，會否增持利豐（494），因為利豐管理層一直看好今年業務增長前景，本港出口貿易業務估計亦復甦，不過利豐股價易受到美國經濟情況困擾。
里昂噚日發表每年嘅風水指數，話香港會行足十年衰運。香港嘅衰運基本上由97年第3季開始，亦即是董特首上場冇幾耐，如果要衰足十年，即係董特首兩屆任期內香港唔會好。
阿虎