法資大經紀里昂證券每年都喺農曆年前公布風水指數，搞搞氣氛。噚日里昂講羊年時運，話香港嘅衰運由九七年開始，長達十年，最壞係舊年馬年，羊年雖然未完全復甦，但會逐步好轉。中國開始行大運，長達二十年。
里昂每年都會揀幾個新聞人物，按生肖推測來年運程，但都係搞笑為主。佢哋話：屬雞嘅房屋及規劃地政局局長孫明揚會喺羊年伊始拋出新九招救市措施，令香港重現排隊買樓人龍，元朗農地會被發展商以每呎五千元搶購；李嘉誠李澤楷兩父子過肥年，畢架山一號以每呎兩萬元開售，數碼港貝沙灣就賣一萬五，排隊人龍長達一公里。不過，孫公並冇如前任者般叫市民入市，反而喝止市民買樓。
就係因為孫公新措施奏效，屬龍嘅財政司司長梁錦松今年決定公務員減薪兩成，都全無阻力，馬上令港府復有財政盈餘；佢夫人伏明霞順利誕下BB，阿松為咗慶祝，決定收回公務員減薪決定，更加加薪五成。同屬龍嘅美國總統布殊會打敗伊拉克，為重建當地投資者信心，將禮聘退任嘅中國總理朱鎔基出任美國證監會主席，令道指高見二萬點。
班法國佬咁幽默，港人亦惟有苦中自娛。
傳真︰2623-9278
電郵︰