陳淑蘭（蘭子）跟前男友William剛分手，可是二人前晚卻手拖手往看首映，態度親暱，不禁令人懷疑二人舊情復熾。蘭子昨日卻表示，現在跟William再見亦是朋友，就算拖手也只是互相關懷。
陳淑蘭跟工程師男友William去年尾宣布因性格不合而分手，但二人前晚卻相約往灣仔會展欣賞新片《新鐵金剛之不日殺機》首映，途中更被目睹手拖手，難免令人覺得他倆舊情復熾。而同場看首映的嘉賓，尚包括黃杏秀、陳百祥（阿叻）、張鎧潼、方中信和韓君婷等。
昨日記者致電蘭子，問她是否跟William重燃愛火，她說：「我哋冇復合，其實我份人就最簡單，大家和平分手都可以做番朋友，𠵱家我同William同祁生（祁文傑）都成日一齊玩，佢哋都係我關心嘅人，大家都維持住最好嘅關係。」那麼蘭子跟William為何手拖手往看戲？她解釋說：「拖手只係代表關懷嘅意思。」
問蘭子現在有否準備接受另一段新感情？她說：「暫時唔諗拍拖，我覺得𠵱家有人陪我食飯、睇戲都好開心，我亦要照顧屋企嗰五隻狗，淨係執狗屎都唔得閒。」下月十四日情人節會跟誰度過？她說：「我會自己去加拿大探朋友，我亦唔會送禮物畀佢哋任何一個（指William、曾國銘和祁文傑），家陣經濟唔好，女仔都係含蓄啲好。」
韓君婷前晚一連趕兩場，她先後到了《新》片和《百年好合》的首映會場，她跟《新》片會場內扮邦女郎的女子合照後，說：「可以扮邦女郎都算世界級靚女，但我一定唔接受全裸演出。」
此外，阿叻對於緋聞女友張慧儀日前練舞時傷頸，他說：「跳舞成日都整親，佢老公（霍紹裘）知點做。我新年會留喺香港過，我會去睇李克勤同阿倫嘅演唱會。至於話慧儀就結婚，到時咪去飲囉。」
採訪：比華利、陳梅香
攝影：陳偉權、何國豪
