曾經喺七十年代風魔唔少香港觀眾嘅日劇《綠水英雌》，無綫最近決定重拍呢套劇。不過個古仔同日劇係唔多同，演員方面就定咗有新人蕭正楠、陳文媛（BoBo）同九人女子組合Cookies。
無綫製作部助理總監梁家樹話：「開拍呢套青春劇，搵咗班歌星做，係希望可以畀啲新鮮感觀眾，佢哋幾位演員泳術都唔錯嘅。」
呢套劇有唔少游水場面，所以啲演員唔識游水就唔會考慮。梁家樹又話最近睇雪兒做嘅《流星花園II》，覺得佢表現好好，有意搵佢返嚟拍劇，但因為冇晒佢啲聯絡電話，𠵱家搵緊方法聯絡佢。另外，由郭晉安擔正嘅電視劇《戇夫成龍》雖然收視高企，不過無綫已經決定唔拍續集。
鞏俐同張藝謀呢對舊情人將會喺下個月柏林影展聚頭。鞏俐今次會為新片《周漁的火車》到柏林宣傳，適逢張藝謀嘅《英雄》會喺柏林參賽，所以兩人會喺情人節當日有機會碰面。
雖然鞏俐重未到柏林，但係佢已經開始為《周》片宣傳，其間不時俾傳媒問佢對《英》片嘅睇法，鞏俐亦大方讚《英》片，重話唔排除再同張藝謀合作。
無綫劇集《天子尋龍》噚日喺尖沙嘴舉行首映禮，劇中演員文頌嫻同楊怡等都有出席，不過主角陳浩民喺內地拍劇，所以冇嚟到。
首映禮度播咗段楊怡同陳浩民嘅激吻戲，做司儀嘅文頌嫻就好羨慕咁話：「可能我對呢樣嘢冷感，自出娘胎都只係錫過阿媽塊臉，從來唔會錫嘴，就算𠵱家拍拖都只係錫幾吓，所以拍呢啲咀戲都會俾導演話我似木頭。」
王家衞嗰套《2046》噚日喺西環荒廢咗嘅域多利羈留所拍外景，美術指導張叔平最早到場，重見到佢喺入面拜神。而梁朝偉同章子怡噚日都有份拍攝，不過記者就淨係望得到佢哋嘅背影，現場用黑布圍住，門口又有守衞睇實，保密工夫做到足，只係見到貨車出入，入面擺咗好多五十年代嘅懷舊木家具。
楊紫瓊早前出席首屆曼谷國際電影節，幫佢部《天脈傳奇》造勢，前日佢為電影節嘅閉幕頒獎禮做特別嘉賓。啱啱喺美國金球獎中奪取「最佳外語片」、由西班牙導演艾慕杜華（PedroAlmodovar）執導嘅《對她有話兒》，喺頒獎禮度贏咗最高榮譽嘅「金人鳥獎」同「最佳導演」。米高堅（MichaelCaine）就憑《TheQuietAmerican》奪影帝，而影后係由芬蘭電影《TheManWithoutaPast》嘅KatiOutinen奪得，不過所有得獎者都冇去領獎。
