恒指最多跌111點，埋單只微跌8點，長實（001）、太A（019）、中移動（941）、九倉（004）等，撐住個市，未受美股隔晚大散影響。大概年關在即，有啲有心人做吓嘢，希望拜年見面時冇咁苦瓜乾咁嘅面口。
太古有寫字樓收租，寫字樓前景暗淡，隻股票先一排俾人柴台，先兩日大行則轉口風，大力推介，太A彈升60仙，太ACall輪9475升16%，收13.4仙，吼回吐時上車。
中銀（2388）亦有人維持秩序，買盤每個價位都駐重兵，尾市剔8.35元，電腦判8.30元收市，升1格。中銀成交唔多，做嘢易辦事，羊年來臨前，相信會做得好好睇睇，咪錯過隻中銀Call輪9462，嗰1%溢價，實在太低。博正股升25仙，揸隻輪可賺2成。
國泰（293）升20仙，收11.70元。唯一隻Call輪9247彈升15%，龍虎榜上排第9。隻輪就夠鐘，剩番1個月，溢價0.6%，槓桿率7.1倍，計數博得過，只不過好難買貨，昨日得14萬份易手。
天安（028）一聲話好多樓盤推出，由11仙彈上12.4仙，隻公司輪390由1仙飛上1.7仙，升幅70%，做咗輪王，明年底到期，溢價75%，槓桿率7.3倍。買賣冇乜意義，若然睇好正股，乾脆揸正股算數。
章盛