每逢農曆新年，好多車主除會為愛駒洗車打蠟扮靚外，亦會替車身損毀嘅地方進行修補；以往車主要做呢類車身維修並唔容易，除要自行到車房格價外，重要冒住手工參差不齊嘅危險。不過，近年一啲大型汽車代理嘅維修部，推出不限牌子嘅維修服務，除手工質素有保證外，就連價錢亦跟坊間車房差唔多；今日我哋就特別揀選咗三間汽車代理所提供維修服務資料介紹給大家，從而可予你有個參考嘛！
記者、部份攝影：黃凱穎
ImageGirl：Margreat
森那美
森那美集團係現時福特、三菱及鈴木等汽車品牌嘅代理商，其維修服務除品質高同價錢相宜外，另一個重點就係時間快；一般車主如只維修車頭或泵把等單一部份，只需一日時間便可完成。據森那美汽車服務部經理陳先生表示，佢哋提供嘅唔單止係專業維修及噴油服務，兼且用上最新維修車身技術，並以快捷取勝；例如響訪問期間所見到嘅一部平治E-Class，頭冚需要上灰修補及重新噴油，只需一日時間便可完成，從而令客人可於預計時間內取回車輛。
陳先生又指出，佢哋擁有兩個專業級嘅低溫焗油房，車身會響攝氏60至70度下噴油及焗油，好處除咗比一般快乾油質素來得更好外，更唔會因為焗油時嘅溫度太高，而令車上嘅電子零件損壞，加上噴油部技師會以嚴謹嘅工序噴油，令到完成品嘅質素與新車沒有多大分別。當中有唔少參加鬥靚比賽嘅老爺車，都會到佢哋嘅噴油部重新噴油，而當中一部舊款保時捷跑車，更連續兩年獲得外觀獎冠軍呢！另外，佢哋亦有為車主提供閃粉噴油服務，但服務範圍除私家車外，就連電單車及5.5噸以下嘅貨車都可以；以一部電單車為例，享用閃粉噴油服務約需$5,000，可謂十分超值。
車身焗油維修
包括噴油、焗油以及修補部件上微細凹凸嘅花痕。
價錢
頭冚/車頂/尾冚或泵把：$1,488（每幅計）
沙板或車門：$1,288（每幅計）
車身外殼原色焗油
包括全車低溫焗油、輕微花痕維修及汽車美容服務一次。
價錢
小車：$12,800
中車：$15,800
大車：$18,800
全車轉換顏色
小車：$17,600
中車：$20,600
大車：$23,600
激閃幻彩色車身噴油
全車噴油價錢另加$4,480
5.5噸貨車及輕型巴士保養套餐
包括迫力調校、更換偈油、更換偈油隔、油渣隔及風隔、皮帶調校、檢查冷卻系統、調校極力子虛位、調校燈影、更換水撥膠及試車。
價錢：$688（適用於所有牌子5.5噸貨車及輕型巴士）
私家車保養套餐
包括更換偈油及油隔、路面測試、車身清潔及車廂吸塵，另加引擎調校或檢查制動系統或檢查轉向系統。
如選擇前者另加後者其中一項服務：$628
如選擇前者另加後者其中兩項服務：$828
如選擇全組服務：$928
查詢：森那美汽車服務中心（25579329）
皇冠
皇冠汽車係香港數一數二嘅大型汽車代理，而豐田車系嘅市場佔有率亦可稱得上係日本車之冠，所以佢哋維修服務中心內嘅車身維修及噴油技師，都係擁有日本廠方規定嘅專業資格。據維修服務經理黃先生表示，所有負責車身噴油同維修嘅工作人員，全都曾往日本受訓；而整個訓練課程係由TMC（豐田汽車）提供，故此每個車身維修工序，都會按照TMC嘅程序進行，以達到廠方嘅最高標準。
皇冠汽車提供嘅特麗汽車護理，係利用特製嘅BasePolymer同抗水保護蠟組成，只需半年修護一次，便能有高抗水度同防止脫落嘅效能，日常只需用清水沖洗便可。另外，除會用上特別嘅車蠟外，響工序上亦非常講究，專業技師會因應車身嘅情況，作出清除花痕嘅工序，然後再以低轉數打蠟機上底層蠟；由於佢哋係依足TMC嘅打蠟指定工序及物料，就算喺香港炎熱多雨嘅環境下都絕無問題，而皇冠汽車更會提供兩年嘅亮麗保證㖭！
至於車身維修方面，皇冠汽車亦提供咗日本專業級嘅微修服務；首先佢哋會將車身分為13部份，以每部份獨立收費，專業技師隨後會視乎車身損毀程度，使用不同修補物及打磨，最後再為該部件作多層噴油。好處係可以讓車主能獨立維修車身損毀部份，而毋須將整部車重新噴油，既省時又慳錢。
現時有好多汽車維修服務中心，都會提供閃亮噴油服務，就連皇冠汽車亦唔例外，而且更提供獨有嘅度身閃亮噴油，車主可在車身噴上一個自行設計嘅圖案；另外，廠方亦會提供部件式嘅閃亮噴油，車主同樣可以選擇性地按不同需要或價錢享用此服務。
豐田車身微修服務
包括修補車身花痕及重新噴油。
價錢：$1,888（每部份計並全車分為13部份）
豐田閃亮噴油車身服務
A.前後泵把：$4,000
B.車身下半部：$8,000
C.自由組合：$2,088（每部份計算）
特麗汽車護理
包括全面汽車美容一次（車身起迹、特麗水晶蠟、車廂內部清潔、清洗引擎艙、清潔胎軨及噴上保護蠟水）、修護服務三次（打上修護特麗水晶蠟），以及高溫蒸氣護理車廂四次（使用消毒藥水及蒸氣為車廂除塵）。
一般私家車：$4,988
房車及七人車：$5,688
豐田車系維修計劃
包括詳細檢查車輛機件、免費更換偈油及油隔，如需採用額外原廠零件維修，可享有人工及零件七折優惠；而車主更可以$500嘅特惠價，參加限期兩年嘅維修優惠計劃，當中包括4次特惠價檢查維修，兩年內Check車4次，多送一次特惠價檢查。
A.1300cc以下：$1,288
B.1301cc至2099cc：$1,488
C.2100cc以上：$1,688
註：優惠期至2月底
查詢：豐田汽車維修中心（28801435）
福方
由福方汽車所代理嘅全屬歐洲名牌（如歐寶、紳寶等等），所以佢哋對歐洲車嘅車身焗油及維修都有極高水準；而現時佢哋正為各車主提供車身局部焗油嘅優惠，每幅需焗油嘅車身部件連去除輕微花痕一律$1,188，絕對係超值之選，但優惠期至1月30日為止（就算於1月30日預約仍可享有此優惠），係啱嘅就要趁快喇！
現時，福方汽車維修中心所使用嘅焗油，屬荷蘭Sikkens嘅出品，並響歐洲汽車市場享負盛名；而福方更用上最新Autoplus配方，呢種配方能令到車身顏色更光亮及耐用。據福方維修部經理表示，如果車主只需維修車身一至兩幅車身部件，一、兩日內便可完成，就算係簡單嘅車門維修，都會使用低溫焗油，故此佢哋嘅維修部經常會出現一條等入焗油房嘅車龍，可想而知佢哋嘅維修水準係幾高呢！
另外響1月30日前，佢哋又會為車主提供一項$680嘅美容打蠟服務，當中包括打蠟、車廂清潔等工序；而佢哋除咗選用3M車蠟外，擁有豐富經驗嘅技師，重會按照廠方所提供嘅打蠟光潔程序，為閣下座駕進行護理工作，務求回復昔日光輝。
福方汽車維修中心響位於鴨脷洲嘅維修總部，現正舉行「新年回家」免費汽車檢查服務，從而為各歐寶及紳寶車主，提供最快捷及詳細嘅汽車檢查服務，務求令你響今個農曆新年，揸車揸得開心又放心；如果需要額外維修服務，人工及零件費用更可享七折優惠㖭！不過優惠期只到1月26日，重唔快啲打電話去預約。
車身局部焗油
包括Sikkens低溫焗油及輕微花痕維修。
價錢：$1,188（每幅計）（原價為$1,800至$2,000）
註：1月30日前預約仍可享用此優惠
汽車美容
包括車身打蠟、車廂清潔、胎軨光潔等等，並選用3M車蠟。
價錢：$680（原價$880）
註：優惠期至1月30日
「新年回家」免費檢查服務
包括詳細汽車檢查及檢查報告，如需維修，人工及零件費用可享七折優惠。
價錢：免費
註：優惠期至1月26日
查詢：福方汽車維修中心（25551660）