昨日講到駐中國嘅外籍僱員來港就醫，帶旺某些私家醫院嘅生意。左丁山問嗰位醫院高層：「現時中國有咁多民企富豪、個體戶大款、上海北京啲萬元戶，假如佢哋都落嚟香港就醫，你哋豈非發達？」高層話：「我哋梗係想啦，但內地人來港入醫院，必須具備MedicalVisa（醫療簽證）。呢張簽證好難攞，要內地醫生提交病歷證明。正常嚟講，要搞四五個月，如果有重病，都搞唔切啦。攞普通雙程證嘅內地遊客，入私家醫院嘅，唔敢話冇，但未成氣候。」
香港搞甚麼科技港、中藥港，都得個講字，反而如果得到內地合作嘅話，成為中國醫療基地，唔係太難。可惜嘅係，內地對香港呢個窮親戚，有啲嘴藐藐，我哋緊張時，佢哋好整以暇，呢啲事有排傾。
話得說回來，內地嘅外資公司外籍僱員一定買晒醫療保險，來港入院費用由保險支付，內地人來港入院，有能力付私家醫院費用嘅，大概只限於富豪級。一位本港隱形富豪，係工廠大廈大王，三個月前患病入醫院，到現在仍然未能出院，啲醫院費、專家醫生費累積起嚟，已超過七位數字，而且不斷累積，不過富豪身家厚，視若等閒。翻譯C一位親友亦入咗呢間醫院，一個月之後，啲兄弟姊妹已經要開會商議點樣頂落去，中產階級雖有積蓄，但送親人入名貴醫院，等於日日燒銀紙，又確係好難長期死頂，翻譯C面臨好困難嘅抉擇。