叫保鑣清場辣㷫白果王
瑪麗嘉兒扮大牌遭Robbie問候

前幾日舉行嘅NRJ音樂頒獎禮，女歌手Shakira做咗大贏家，唔知RobbieWilliams同瑪麗嘉兒（MariahCarey）係咪因為冇獎攞食白果，竟然喺後台炒大鑊，出名口臭嘅Robbie重爆晒粗問候瑪麗嘉兒㖭。

讚盜版音樂遭炮轟
表面上聽落Robbie好似冇乜風度，但係我羅拉收到料，原來係瑪麗嘉兒扮大牌，事緣佢以為自己喺頒獎禮入面係至大粒嘅歌星，所以完全唔畀面其他歌手，重喺後台吩咐佢二十個保鑣清場，叫其他人唔好阻住佢條路，Robbie見狀即刻大嗌：「F××koff！你當你自己係邊×個？」跟住佢兩個即刻互超，啲火藥味大到隔籬嘅CraigDavid同KellyRowland都頂唔順，之後瑪麗嘉兒就成晚都當Robbie透明喇。
另外，Robbie早幾日接受訪問大讚網上盜版音樂，結果即時遭人炮轟，前日英國文化大臣話佢咁講同做幫兇冇分別，重話佢根本係幫啲壞人講好說話！雖然Robbie俾人勁鬧，但係我羅拉覺得俾人鬧慣嘅佢，應該都唔會咁易收口。