郭晉安走紅帶挈女友拍劇
馮仁昭四圍超：旺嫂見Honey要預約　搞錯！

無綫劇集《戇夫成龍》收視報捷，佢哋順勢再開拍古裝劇《怪俠一枝梅》，由正牌旺嫂、郭晉安女友歐倩怡、楊怡同三T成員之一嘅蔣雅文（Mandy）孭飛，重由溫兆倫飾演怪俠一枝梅。
可能無綫見《戇》劇由郭晉安飾演嘅阿旺咁鬼成功，所以再接再厲，拍多啲古裝搞笑劇，重搵埋現實生活中嘅旺嫂歐倩怡演出。由於阿旺咁鬼忙，少咗同女友見面。

憂男友唔夠瞓
不過歐倩怡對男友絕對有信心，佢話：「我哋見面時間真係少咗好多，但我唔擔心感情會變，只擔心佢唔夠瞓同唔夠營養，我𠵱家約佢食飯都要預早兩個星期。」
此外，Mandy今次第一次拍古裝劇，噚日馮仁昭見到佢個造型認真麻麻，有啲似男扮女裝，連劇集監製張乾文都話要改善一吓喎。

阿妹取消個唱冇得退票？
張惠妹喺大馬嘅個人演唱會取消後，餘波未了，據當地傳媒報道，有位阿妹嘅忠實歌迷黃小姐，買咗五張二百蚊馬幣（約四百港元）嘅門票，佢知道阿妹嘅演唱會取消後，立刻依指示去指定嘅地方退票，點知有關方面指佢冇正式收據，唔願意退錢，令到呢位黃小姐不知所措，佢話當買咗個教訓喎。

郭羨妮走光係幻覺
郭羨妮噚日喺尖東出席記者會，佢將會擔任《華姐》嘅表演嘉賓，同陳慧琳及葉璇表演大型歌舞。上次郭羨妮同馬浚偉跳拉丁舞，件衫鬼咁性感，重俾人話佢洩春光，但係佢事後就堅決否認，噚日佢又再強調話：「我上次冇走光，上次出事係所有人嘅幻覺，今次我唔會再俾任何幻覺大家。」

阿姐成日斟新抱茶
汪明荃（阿姐）同羅家英噚日喺電視城擔任《都市閒情》嘅嘉賓，早前家英哥嘅媽媽入咗醫院，心臟一度停頓咗七分鐘，好彩最後冇事。問家英哥個媽咪想唔想飲新抱茶或者抱孫？家英哥好鬼馬咁話阿姐經常同佢屋企人食飯，所以成日都會有機會斟茶畀佢媽咪飲喎。