內地發展商起樓限制較香港少，所以每個樓盤都好有特色，往往有令人意想不到嘅單位類型出現。
蘭西最近收到一張內地樓盤嘅宣傳單張，話樓盤提供3層空間嘅「電梯別墅」，聽到一頭霧水。
經過了解，原來係分層大廈，所以有電梯。但發展商就強調單位可以擁有別墅一樣嘅生活空間，咁即係點？原來單位樓底特高，有二十六呎，單位入口嗰層係飯餐、廚房同兩個睡房，上半層就係客廳同平台花園，再上半層有兩個房間。單位千三到千四呎，每呎三百零蚊，重有價講。
個盤另有一款八百呎單位，樓底十三呎，所以發展商就加建閣樓，咁就多一層樓面可用。
呢個盤就係東莞常平嘅麗景花園綠湖居第二期。聽講好多客對呢類單位好感興趣。
農曆新年臨近，各大發展商嘅商場都搞新年裝飾同活動，蘭西收到唔少呢啲傳真，其中沙田第一城嘅第一城中心同銀城商場，都有唔少迎新歲活動，購物滿一百蚊可以換利是封。第一城中心重有「農曆新年特賣嘉年華」。至於年初七係「醒獅賀歲表演」。
大家可能覺得唔係好特別，不過，發放呢個消息嘅係長實集團，佢哋舊年就增持沙田第一城商場嘅權益到五成。
發展商舊年搞咗好多銷售比賽，目的係鼓勵代理努力促銷樓盤。中原地產就囊括咗四家發展商嘅銷售大獎，分別係恒基、九龍倉、新世界同南豐發展。噚日就喺南豐手上接過呢個獎項。
南豐舊年主要推售嘅新盤係荃灣翠豐臺、小欖浪濤灣同半山羅便臣道80號。
另外，今年信和突擊推出嘅元朗帝庭居，都頒咗個銷售獎，由美聯物業攞到。
數碼港貝沙灣嘅密集式宣傳攻勢，果然一次比一次強勁。淨係個會所，就分開幾次介紹。聽日繼續講「零消費」富豪生活會所系列，繼續軟銷會所設施。最識享受嘅電盈基建主席李智康，會同傳媒坐遊艇，喺海上欣賞規模龐大嘅貝沙灣。另政府要再研究南區發展，影響到條鐵路興建，對貝沙灣唔知有幾大影響？
今日逾千名代理赴考，參加貝沙灣銷售筆試。喺九龍灣展貿分段進行，試題係中文填充題，若果考到優良成績，電盈會頒發優異獎，又幾有挑戰性。
舊年美聯住宅部做到最多數嘅營業員係沙田瑞峰分行何能儉，由於佢專做貴價豪宅，所以全年唔係做好多單成交，都可登上寶座。
最近蘭西同佢傾開，先知原來佢舊年促成嘅交易，只得一單租務，就係佐敦德成台，個單位有成三千幾呎，只得兩個人住，不過有3隻貓同4隻狗。個租客原本住開沙田別墅，想賣樓換區住。要幫個客賣樓，就要先幫佢搵到地方租至得，所以何能儉就嗱嗱臨幫個客搵單位租，跟住順理成章幫個客賣埋間別墅。
近排住宅樓市點睇？蘭西可以同大家講「好極有限」，點解咁肯定，因為有迹可尋。
蘭西每日收到不少新聞稿，多數係最新住宅成交，但發覺呢排唔同代理行出嘅新聞稿，會講埋同一單成交，甚至翻炒隔日嘅買賣。好明顯係市場成交唔多，甲代理行索到行家嘅成交，就即時出稿，做到嘅乙代理行又出稿，咁同一單成交就有兩段稿，驟眼睇，以為個市好好景。不過，代理行都好君真，係自己做嘅就話自己行促成某單位交易，係行家做嘅，就話錄得有某單位易手，未至於誤導大眾，將行家嘅成交，當成係自己做嘅。
蘭西
電郵地址：
