身為時裝名牌Moiselle代言人的蔡少芬，昨日穿上薄薄的春裝在大浪灣為品牌拍攝2003年春夏新裝目錄冊。蔡少芬在十三度低溫下捱冷扮靚大擺甫士，獲Moiselle老闆娘手執擋風板為她擋風，伊人揚言暖在心頭。
蔡少芬（Ada）出任代言人的時裝名牌Moiselle近年發展速度極快，Ada亦連續五年獲邀成為該品牌的imagegirl。昨日Ada為Moiselle拍攝2003春夏新裝目錄冊，由早到晚拍攝近十小時，一日內換了二十多套服裝。
今次春裝廣告目錄冊以外景為主，日裝要表達陽光、海灘的清新氣息，然後在中環星光夜景下演繹高貴晚裝。
Ada由早上十一時起，在只得約十三度的大浪灣吹着海風拍攝，只穿着單薄的雪紡、喱士春裝，冷到不得了，Ada說：「全日最辛苦係喺呢度拍攝，好凍，成塊面都凍到僵晒。不過，影得靚就幾辛苦都值得，老闆娘好錫我，重幫我揸擋風板擋風，工作人員又畀暖包我袋。我姨媽就沖定參蜜畀我飲，真係暖在心頭呀。」
Ada揚言自己身體好，不怕捱病，稍後更會為服裝店剪綵，她說：「公司呢幾年幾好，有人話我係招財貓，我都望公司愈做愈好，我就長做長有，加埋人工㖭。」
Moiselle老闆Bobby偕妻Shirley昨日親自到場支持，她對Ada讚不絕口說：「Ada好稱職、又靚女、着衫好高貴同feminine（女性化）。佢着過影相嘅衫都特別好賣，尤其內地遊客反應最好，我哋唔會換人㗎。」
