一手發掘張栢芝出道的經理人朱永龍，年前入稟起訴栢芝毀約，事後一直有傳中國星付了四百萬元給朱永龍替栢芝贖身。但原來朱、張二人至今仍在對簿公堂，朱永龍昨日更強調從未收過中國星一毫子，並透露已申請法律援助，對官司誓不罷休。
朱永龍於九八年一手發掘張栢芝，並與她簽下五年經理人合約，但甫出道即大受歡迎的栢芝，在簽約一年多後即轉投中國星向華強太太陳嵐的懷抱。朱永龍即以未能履行合約為由入稟控告栢芝，未料這宗官司一拖便是三年，至今二人仍在對簿公堂。
雖然近日有報道指朱永龍曾在栢芝跳槽中國星後，收取向太付出的四百萬「贖身費」，外界亦一直以為朱永龍與栢芝已和解，雙方再無轇轕，但昨日現身紅館為張學友演唱會擔任舞蹈總監的朱永龍，接受本報訪問時卻強調自己從未收過向太一分一毫。
朱永龍說：「我唔係想摷番呢件事嚟講，在情上唔想再講啦，但在理上唔公平，我𠵱家重打緊官司，我冇收過呢四百萬，所以要以正視聽。段報道出咗之後，有人以為我搞掂晒，但咁嘅誤會對我嘅官司有影響，我因為呢單官司而引起其他官司嘅出現，都有成三、四單，到𠵱家我已經花咗四百幾萬喺打官司上，重未計我當年投資喺栢芝身上嘅錢，件事拖咗咁耐，對我嚟講造成好大嘅打擊。」
朱永龍透露向太過往確曾向他提及為栢芝贖身一事，他說：「係有接觸過，但解決唔到，其實向太喺呢件事上已經好幫手，我自己都好想和解㗎，但到𠵱家都冇辦法解決，我冇得罷休㗎，唔係我唔想罷休，係件事已經令到你無法罷休。」
問朱永龍堅持打官司會否加重其經濟負擔，他說：「我初頭係有啲經濟困難㗎，呢件事令到我事業停滯，我父母重擔心到血壓高，好彩有好多朋友幫我，所以我都唔使問人借錢。而打官司方面，我有政府支持，𠵱家我有法援。」
問到朱永龍與栢芝間的官司牽涉多少金錢時，他說：「唔知，冇實際計過幾多，我聽人哋估計，會有幾千萬。我花咗好多心血先成功捧紅栢芝，為此重欠落好多人情債，佢冇理由話走就走，我希望用公平嘅方法去處理，我都好有把握。」
日前是朱永龍的生日，問到栢芝曾否致電祝賀他時，朱永龍苦笑說：「佢咁耐以嚟都冇打過電話畀我，但我同栢芝始終係朋友一場，見到佢𠵱家咁，人又瘦，我都希望佢身體健康，開開心心。」
據悉中國星方面因栢芝與朱永龍的官司未了結，故一直只與栢芝簽訂電影合約，雙方並無經理人合約束縛。記者昨日致電向太，查詢朱永龍未能與她解決為栢芝贖身之事時，向太竟在電話中說：「叫佢去死啦，我使乜同栢芝贖身呀？我又冇簽栢芝經理人約，我知道朱永龍搵咗法援資助打官司，唔怪得香港政府出現赤字啦，亂咁接啲官司嚟打！」
採訪：朱芷瑩、陳月媚 攝影：何國豪
