大市連跌3日後，有啲反彈，恒指進帳16點。3隻國內電訊股都造好，中移動（941）收19.05元，升10仙。
中移動上周三最高20.20元，跌到𠵱家，調整幅度差不多6%，將有技術性反彈，前日成交25.3球，昨日得番12球，沽壓明顯減少，博正股上番20元以上，唔係奢望。公司公布上月新增用戶數字，中性偏好，對股價會有刺激。睇好中移動短期走勢，搵啲中移動Call輪炒兩手發新年財。傳統對象係9532同9526，不過𠵱家咪揀呢兩件，因為兩隻輪3月初夠鐘，溢價9個巴仙以上，唔適宜期望正股個零月內有升幅1成。
應該揀比較遠期嘅9650，呢件逐漸取代上便兩隻，成為主流對象。隻輪7月到期，現價13仙，溢價14.4%，槓桿率14.7倍。隻輪上月中以27.4仙發行，得番一半，上升目標價係上周頂位19仙至20仙。
博電訊股再好番啲，亦可以吼吓和黃Call輪。和黃（013）昨日最高50.25元，收50元，升20仙。傳統對象係9518，但要留意隻輪剩番1個月壽命，溢價將會日日收縮，直至嗰3.3%溢價冇晒為止。可以諗些少9597，5月夠鐘，現價26仙，溢價13.2%，槓桿率19.2倍。溢價唔低，炒兩炒可以，揸耐啲則未必着數。
章盛