葉劉噚日去紅磡海逸酒店出席「第五屆香港安全標誌頒授儀式典禮」，頒「產品安全大使」委任證書畀歌星李克勤。兩個人一見面就互笠高帽，克勤劈頭第一句就話：「葉太，其實我好鍾意你㗎。」葉太笑住回敬：「我個女都好鍾意你，好鍾意聽你嘅歌，成日喺屋企播你首《高妹》。」克勤重即刻話送兩張飛請葉太同個女睇佢農曆新年同譚詠麟嘅演唱會。
克勤後嚟接受記者訪問，繼續大讚葉太：「我今日嚟係想認識佢，咁多官員之中我最欣賞葉太，可以講係偶像，政府好多政策同糾紛，例如二十三條咁，佢都答得好好，我自己唔會好似阿倫咁挺董，但我對葉太印象好好，佢保護到香港市民，答嘢又有說服力，有幽默感。」睇嚟葉太以後應該多啲出席娛樂圈活動，同做慣戲者一齊，一定冇同大律師、的士司機、酒樓侍應一齊咁冇癮啦。
（圖）葉太話佢個女成日喺屋企播克勤首《高妹》，克勤就即刻話送演唱會飛畀葉太兩母女。
傳真︰2623-9278
電郵︰