八萬五、數碼港、二十三條，每一樣都搞到港人怨聲載道，也許我們要夾二百七十大元，好送一套最新的《SimCity4》給特首董伯伯，讓他領略做市長的精粹。翻閱說明書，你會發現這個老牌遊戲開宗明義，做市長第一項要留意的是「市民優先」，第二是「眼觀四面，耳聽八方」，否則民怨日深，只會搞到財赤嚴重、城市破落、居民遷走，董伯伯，你明白咯……呵！
記者：徐影龍
逢星期一至五刊出
唔係講笑，千祈唔好學特首咁漠視市民嘅聲音，因為Game內繼承傳統作風，設有一眾財務、教育等大臣侍候，作用係提點特首要注意啲乜，講穿咗其實即係教學程式，定時定候提醍你水、電網絡，又或稅率太高等問題，所以定時查閱建議係非常重要，若果置諸不理自顧自玩，結果只有一個──財赤嚴重至不可收拾，醫番嘥藥費。
新版《SimCity4》同之前嘅《SimCity3000》一樣，以即時3D運算所有建築物及地形，360°觀看自己城市夠晒滿足，最正係今集加入「上帝模式」，除可任意改動地形外，高興時可隨時轉換日夜景色睇萬家燈火，心情唔靚又可加入各式天災，肆意破壞城市，夠晒變態。
玩完「上帝模式」，跟住應正正經經咁選擇「市長模式」，開始建立一個負責任嘅政府。玩法跟過往大同小異，住宅、商業及工業適當規劃發展，人口自然慢慢增長，當然你可定立發展方針，以商業掛帥或大賣高科技，甚至圍住海邊起十個八個數碼港都得，問題係符唔符合經濟效益啫。
新加玩法係跟另一模擬Game《TheSims》（模擬市民）有連動關係，玩家可將《TheSims》內創作之人物，悉數搬入《SimCity4》內居住，雖然屬自行生活唔可以控制，不過會定時滙報行蹤畀你，如搵到工、搬屋等，十足十親生仔一樣，令人更有動力去改善生活環境，投入感自然大增。
《SimCity》由1989年推出首集至今，已經過14年光景，移植版本更跨越每一個平台，由蘋果電腦到IBMPC、紅白機、超任、N64、PS、PS2甚至PalmOS，都可見其足迹，每一集都有新元素吸引玩家。今日就精選其中五個版本出嚟，等新一代玩家見證其光輝歷史。
在蘋果電腦一炮而紅，玩家首次一嘗當市長號令天下之快感，信徒火速大增。
四年內迅速吸納大量忠實Fans，令《SimCity2000》未出先轟動，移植至Windows3.1之版本加入大量建築物及交通工具。
當年移植至64DD之版本，比《SimCity3000》更早採用3D概念，玩家可ZoomIn觀看市民生活細節，可惜外加擴充記憶卡其運算速度及導覽仍甚慢。
真正全3D化之一集，更精細之貼圖及建築模型，令都市更添生氣。
憑住目前Palm之機能，運行大量數據都冇問題，流動性令玩家更為投入，可惜暫時仍未支援最新嘅PalmOS5.0。
遊戲類型：模擬
對應機種：PC
遊玩人數：1人
售價：$270
開發商：MAXIS
(c)2003ElectronicArtsInc.Allrightsreserved.
要好好管理一個城市，最忌好大喜功，一味開地起樓，應該循序漸進，先建立細小規模嘅社區，正確鋪設水、電等設備後，人口自然慢慢增長。待收支平衡及人口發展至中型規模後（約莫為獲得市長屋），便可陸續加入學校、醫院等社區設施。各式Landmark（地標）售價偏高，會加劇財赤，應待商業區發展成熟先慢慢加入。
另外最多人遇到嘅問題，就係Game內延遲情況嚴重。由於全Game採用即時運算關係，部腦配備差啲都行得好辛苦，舊機到達數萬人口更會出現死機情形。解決方法有三：首先更新顯示卡驅動程式，跟着下載最新版DirectX（Ver9.0），再關掉視像選項內所有Effect及減低解像度至800×600，用齊呢三招相信會有所改善。最後奉勸一句，顯示卡少於16MB記憶體或Notebook用家，都係少玩為妙。
PC版我每一集都有玩，今集例牌地更靚，冇乜大驚喜。初時會用作弊檔玩無限金錢，待領會管理技巧後，會以真功夫建立自己嘅城市。
雖然鄰舖嘅翻版好好賣，不過我哋專賣正版嘅舖頭去貨都好理想，好多機迷覺得$270玩足成年，點計都值得捧正版場。