港股昨日觀望氣氛濃厚，恒指高低波幅只有47點，走勢十分牛皮，收市報9568，微升16點。
恒指連跌3日，共321點後終告喘定，昨日歐洲股市持續向好及美股期指上升，但投資者明顯未回復信心，好友試闖20日線（現處9606）的力度也不足，趙飛雲按原定計劃於0.111元水平買入30萬份恒指Put輪9556。
老實講，外圍美股昨晚可能會反彈，昨日買Put輪已預咗可能先捱一兩棍，暫以10日線作止蝕位。由另一個角度睇，杜指若昨晚跌勢持續，並跌穿10月延伸至今升軌支持8460，到今日才追恒指Put輪已盡失先機。
港股波幅只有47點，但成交仍有53億元，主要由於中資股又再發威。趙飛雲過往長期在內地工作，可能愈清楚內地情況就愈無興趣買中資股，因此錯過咗回歸前嘅紅籌升浪。近年中國經濟真正騰飛，情況有所改善，但公司透明度不足，存在變數多，仍然令人有所顧忌。
不過，短期可留意中國電信（728），隻股招股時搞到風風雨雨，上市後亦不時傳出利淡消息，但近期走勢已明顯轉強，創出1.54元新高後出現整固，只要守穩1.47元支持，將反覆再創新高。
內地互聯互通費將調整結算標準，一旦落實中電信獲益最大，單炒這個概念亦可支持中電信再創新高。現水平可伺機吸納，短炒以1.45元止蝕。
趙飛雲