《今日美國》噚日公布佢哋每周嘅球迷投票結果，「加拿大飛人」卡達竟被球迷選為NBA最名過於實嘅球星。
卡達入咗NBA都有五年，頭幾年嘅表現好搶眼，俾NBA同球迷捧為飛人佐敦嘅接班人，點知近兩年表現就愈嚟愈唔掂，上季速龍冇咗佢反而愈打愈好，重爆冷入埋季後賽；今季卡達又舊患復發，只係打咗十場波，累到速龍變成東岸魚腩。早前更有消息話速龍想把卡達交易到騎士。
不過我求大俠想講句公道話，卡達嘅表現確實令人幾失望，但係佢近兩年成日受到膝傷嘅困擾，根本冇機會表現出自己嘅真正實力，等佢完全康復後，我哋再下判決都唔遲，何必匆匆就判卡達「死刑」，相信好多球迷都有同感，如果唔係嘅話，卡達都唔會又成為今年東岸嘅明星賽票王啦！
「戰神」巴迪斯圖達由羅馬過檔國米都算係一月轉會市場重開後嘅大新聞，至於佢嘅羅馬隊友迪維基奧就好開心，重猛話祝福巴迪高！梗係啦，𠵱家羅馬冇咗巴迪高，新星卡斯辛奴又同教練卡比路唔咬弦，身為前鋒嘅迪維基奧自然多咗出場機會啦，話唔定喺今日嘅意大利盃都會上陣㖭！
擾攘咗幾乎半季，保頓嘅前鋒歷基斯終得償所願，俾球會掛牌，而歷基斯本人重猛叫熱刺領隊荷杜救佢出苦海。唔係我求大俠睇死歷基斯，佢今屆表現認真麻麻，只入得七球；加上保頓又要六百萬鎊（約七千五百萬港元）轉會費同熱刺前線又唔係等人用，睇嚟歷基斯要走都唔係咁易。
埃克塞特雖然係英格蘭丙組仔，不過佢哋領導層就大有來頭，喺英國念力大師基拿做咗會長後，已搵咗美國著名歌星米高積遜同埋魔術師白連做榮譽董事，最近重搵埋英國演員大衞普羅斯㖭。大衞普羅斯係邊個？知唔係電影《星球大戰》入面嘅黑武士囉！唔知佢同球員打氣時，會唔會講星戰嘅金句「usetheforce」呢？
早輪我求大俠咪講過德甲聯球會柏林哈化，要全體職球員都講德文，估唔到呢單嘢𠵱家成為德球壇辯論焦點，德甲聯球會拗緊跟唔跟風。不過，有「荷李活球隊」之稱嘅德甲龍頭大哥拜仁慕尼黑就話唔會咁做，佢哋發言人漢域克重好幽默咁話：「有啲外援都唔知自己會留隊幾耐，無謂迫佢哋學德文啦！」