港股噚日波幅僅47點，最後升16點，收報9568，成交僅53億元，交投轉靜。中移動（941）剛公布上月營運數據，顯示新增客戶持續放緩，高盛及大摩沽貨，但股價企硬，收報19.05元，升0.10元。其實美資及歐資大行早就叫客戶減持，現時外資手上貨源有限，近日中移動沽盤頗大機會是對沖基金作祟，期指本月主要係淡倉底，對沖基金盡力沽空，為期指結算造勢亦十分正常。
黑客話，勝獅（716）今日宴請證券界及基金經理，主要係想講述公司在國內的貨場網絡發展，及去年業績有改善等，目的當然係想芬佬投資該股，如果有基金感興趣，就進一步傾吓配股。此股最近升破2.20元後出現回吐，噚日大升7.3%，重回2.20元收市。勝獅國內發展在在需財，現時股價仍處於高位，最適合配股集資，只可惜隻股成交一直稀疏，加上股價正由高位回落，芬佬存一定戒心，聽聞反應唔算理想。
巨川國際（729）近期股價急挫後交投轉靜，噚日平收0.10元。Cookie話，據講早排沽盤來自不少大行，因為公司重組時，發行大量新股畀債權銀行抵債，以往債權銀行一般都善價而沽，但今時唔同往日，聯交所日後一旦修例，細價股若不符合持續上市資格，上市地位隨時不保，到時才沽會恨錯難返。
港基國際（636）股權會否易手一直受市場注目，市傳華僑銀行對港基有興趣，可惜阿拉伯銀行叫價過高，導致談判陷入僵局。i師傅則睇法唔同，佢話今次阿銀沽售港基股權，錢只係其次，主要係阿銀唔想花精神照顧多一項投資，叫價高係油王一向慣例，所以唔排除單交易會出現突破性發展。港基噚日平收2.375元，現水平仍有值博率。
阿虎