最近啲醫療新聞好熱鬧，將軍澳廢物堆填區發現屍體殘肢令港大醫學院冇面，醫學院院長林教授開記者招待會，好似想喊，不過威爾斯醫院失去換肝手術權，中大嘅鍾院長，或會淚向肚中流都唔定。
香港嘅醫療系統，連年削減資源，因政治問題，楊永強畏首畏尾，唔敢增加收費，啲公立醫院做到氣咳，愈氣咳愈蝕（津貼）得多，醫管局愈要收緊開支。一位教授對左丁山講，一啲高級醫官（SMO）四十歲上下，因為升唔到做顧問醫生，做到心淡，一吼準機會知道自己嘅專業有市場嘅，就會辭職出外掛牌，搞到醫院人手日趨緊張。
公立醫院做到頭暈之餘，私立醫院仍然有生機噃。呢日碰到一間港島私家醫院嘅高層，問佢生意如何，佢笑笑口話：「去年超標。」咦，好難聽到「超標」呢兩個字嘅喎，問佢如何得到如此佳績，佢話：「中國熱，益咗我哋，唔少外國公司派expatriates進駐上海、北京，由於啲expat信唔過內地醫院，一有病就飛嚟香港入院，益咗我哋，睇嚟今年仍有大幅增長。以後幾年，駐中國嘅外籍僱員只會愈來愈多，對我哋好有利，但如果北京、上海、廣州有外資開辦一流私家醫院嘅話，或者生意會少番啲。」到時先至算啦，呢間私家醫院本身做開香港嘅expat生意，現得中國開放之利，enjoy吓先！