耀科國際（143）將於1月28日公布業績，近幾日股價則蠢蠢欲動，上周四重喺0.20元樓下浮游，但周五突然破位急升，成交重大咗好多，噚日雖然有回吐壓力，仍平收0.23元，成交股數899萬股，金額208萬元。
小初開頭以為今次耀科會有佳績公布，但一直睇好耀科嘅經紀陳，居然話唔好太樂觀。經紀陳向來非常捧耀科場，因耀科中期盈利超過2億元，如果冇乜意外，全年業績應該好吸引，加上現價往績PE只係2倍，周息率高達16.5厘，照計好正斗。
經紀陳話，聽講有啲應該收到嘅數，唔知會唔會收到……總之係天有不測之風雲啦。但呢幾日耀科嘅交投咁大又點解釋？佢話可能有人計錯數。
經紀陳嘅料，有時都好準，所以唔敢唔信，好似佢上次講中國數碼信息（250）無懼追數問題，有關人等早有安排。隻股果然繼續升，真係令小初要講個服字，但家陣就一定唔會跟入。
慕容小初