作為高性能跑車車迷嘅你，會否對新款Skyline產生好感呢？如果有的話，相信新推出嘅SkylineCoupe雙門轎跑車，定必會成為你嘅「第二最愛」；因為新款SkylineCoupe，除造型仍貫徹原有Skyline四門版嘅流線型設計外，雙門配搭加上大口徑跑車合金胎軨，完全將一股誘人嘅高性能跑車韻味慢慢滲透出嚟。當你打開車門，前座一雙桶形跑車座椅定必將你深深吸引住，坐上去重有妥貼舒適嘅享受㖭！如果你作為後座乘客，亦都可以感受到嗰份乘坐舒適感呢！
而當一台編號VQ35DE嘅3.5公升V6DOHC引擎啟動後，尾喉發出嘅雄渾咆哮聲，絕能令你陶醉其中，重有由呢台引擎所發出嘅280ps/6200rpm馬力，以及37.0kgm/4800rpm扭力，配以6前速手波或5前速半自動波，無論起步加速都有敏捷暢順嘅反應，並能增添不少駕駛樂趣。想擁有嘅朋友，就要留意新車抵港日期喇！