呢排港穗兩地興講港珠澳大橋，作為發起人、哥頓胡應湘成日俾人問起呢條橋。噚日八方出席理大嘅「勞斯萊斯」級學生宿舍開幕禮，哥頓又俾人追問呢件事，佢嘅答案係「大家唔使心急」。
唔講呢條橋，咁講番合和。佢同八方講，自己已經半退休，慢慢將工夫交畀接班人，即係個仔文新打理。佢又話以後仍會陸續再送股份畀個仔以示鼓勵，重話合和唔使佢擔心，因為最辛苦嘅（撇帳一百億）都已經捱過咗。
講番個宿舍，大學呻窮，但係宿舍就愈起愈豪，理大呢座學生宿舍，設備媲美私人豪宅，有泳池、健身室唔在講，重有卡拉OK房、展覽廳同平台花園等。
宿舍位處半島豪庭同居屋樓王紅灣半島之間，部份有維港海景，有女宿生咁話：「我覺得同住豪宅冇乜分別，你話邊間學生宿舍有咁High嘅景觀吖！」
傳真︰2623-9278
電郵︰