LMF樂隊嘉賓成員之一的李燦森，前晚大爆LMF早於兩年前已被政府有關部門列入黑名單，所有政府場地都不能租借給他們演出，理由是恐怕他們煽動群眾情緒引起意外，而李燦森亦大談掟水樽不會掟傷觀眾的方法。
林海峰前晚在柴灣為新碟舉行「林海峰我撐你音樂錄像試映會」，李燦森（阿Sam）、許志安、何韻詩及Shine的徐天佑均有到場欣賞。
李燦森是LMF樂隊嘉賓成員之一，日前滾石唱片舉辦的band騷，本來在啟德舊機場舉行，但有關部門不批出場地，結果要改在九龍灣國際展貿中心較細場地演出，並要安排大班保安及警員到場，對此阿Sam透露，原來LMF早於兩年前已被列入政府有關部門的黑名單中，所有政府場地都不准租借給他們演出。
阿Sam說：「當時LMF第一次搞騷想借添馬艦都唔批，政府有關部門理由係話怕我哋煽動群眾情緒引起意外，我哋只好向私人地方着手，都冇計。」他續說：「唔知咁關唔關二十三條事呢？我簽咗名反對㗎，阿仁（LMF主音）問我撐唔撐，我話梗係撐，我都特登去民政事務署攞小冊子睇，知道乜嘢事至簽名反對㗎。」
至於近日接連有觀眾在band騷中被歌手掟中水樽一事，阿Sam說：「我早排喺泰國拍戲，都冇去睇到。其實掟水樽殺傷力係幾大，最緊要掟得有技巧，支水要開咗蓋，樽口向出，掟出去時啲水向前行先，fing晒出去，個樽掟親人都冇事囉。其實歌手掟水都係出於苦心，台下嘅人都好hot，畀啲水佢哋舒服吓啫。」
問阿Sam歌手掟水樽是何心態？他說：「玩囉，外國啲band騷重犀利，成支結他飛落台，有時成個人飛落嚟呀。」阿Sam得悉日前滾石舉行的band騷不讓觀眾帶水入場，他說：「咁唔啱，冇水飲好辛苦，出嚟玩就預咗啦，又唔係唱情歌，台上唱歌都有危險啦，都係搞氣氛啫。」阿Sam續說：「粗口手勢就例㗎啦，見慣不怪，秋生話嚟就嚟，上次有個騷佢攞住把菜刀出嚟唱㖭啦。」
此外，林海峰（阿Jan）推出新碟《我撐你》，他說：「我隻碟畀大師睇過，佢話如果放喺屋企可以鎮住啲風水，最好擺喺唱機上面鎮住，所以要買兩隻。一隻要嚟鎮風水，一隻要嚟聽。」阿Jan於本月二十八日生日，但他不會慶祝，他說：「搭住過年啲日子，啲人叫都唔嚟呀。」
採訪、攝影：李珮洳
