大市牛皮待變，但紅籌、國企同個別二三線股就繼續有追捧，上升層面擴散，上升股（不包括認股證）有360多隻，係近期嘅高數字。大市經調整後，氣氛有好轉迹象，恒指收市升16點，收報9568，成交53億。
今年中資股會見大升浪，有排升，特別係國企個勢會更勁，噚日有大成交支持最威水嗰隻係中海發展（1138），高收1.96元，升7.1%；鞍鋼（347）亦不俗，收1.35元，升5.4%；其他近日有推介的如粵海投資（270）和海油服務（2883）都有好表現。
光大控股（165）噚日早市2.3元任買，中段過後，基金買盤掩至，一路掃到上2.475元，收2.45元，升5.4%。光控升勢由聯營光大銀行業績帶動，但據熟悉內情嘅人士指出，鑑於中港兩地會計準則不同，光銀列入光控條數，暫時唔易計得清楚，光銀對光控影響是壞是好，要到3月光控宣布末期業績時才會大白。因此，為穩陣計，暫時宜略作保留，若有「心足」利潤，不妨先計一計數。
中國電信（728）有大行「集體」推介，但亦見佢哋排隊咁沽，其實此乃一貫的壓價手法，明沽暗入，單係噚日成交已7000多萬股，你話散戶買得幾多？由去年11月底開始，中電信走勢形成大圓底，近日升上1.54元在1.5元水平整固，暫時受制10日線（1.50元）同下降軌阻力，若升破1.51元，中期升勢即可確認，初步目標為1.7元，大行報告推介則以1年為期，可見1.8元。
深圳控股（604）大落後，噚日收1.12元，雖升4仙，但同去年12月初比較，升幅僅6.6%；同期粵投由0.7元升到噚日嘅1.11元，升幅係58%！
至於計PE，深控亦係窗口股中最低者，上實（363）、北控（392）同天津發展（882）都近8倍，粵投預測PE12倍，深控預測PE則約5倍，拍番上去，可以升幾成。
由去年8月開始，深控形成大圓底收集形態，頂部在1.16元，破位而上，量度上升目標為1.45元（預測PE亦只係7倍多），亦即去年5月底的高位水平。大圓底收集完成後，通常都會急升。
郭兆誠