《戇夫成龍》大結局能否有50點收視就未知之數，但「阿旺」大旺就係鐵一般嘅事實，不過勢估唔到阿旺熱潮會殺入童裝界，一眾爸媽都話要新年買番套阿旺ChinaLook畀仔仔囡囡，等佢哋過年好似阿旺咁醒目，一啲都唔戇！
記者：梁煒健
攝影：梁煒健、周旭文
ImageKids：岑穎賢、Cookie
逢星期一至四刊出
男的一套四件頭中山領唐裝衫，全套衫、褲繡上金錢及龍圖案，極具貴氣；紅色織錦小背心手工十分精細，襯埋一頂金色小卜帽，確係有少爺仔嘅氣派。至於小妹妹的側襟旗袍是以全夾棉做成，且縫上竹葉及梅花織錦圖案，亦有海虎毛圍裙邊，外觀已經不俗，襯埋一件有海虎毛圍邊嘅織錦披肩㖭，更加有大家閨秀之感。如果屋企有一男一女，買齊呢兩套傳統童服，出外拜年一定矚目。
外套以泡泡領作設計，摺袖及衣領均有海虎毛圍邊，保暖程度不俗。外套縫有傳統嘅中國兒童圖案，以及用中國特色嘅如意鈕作衫扣，兩者均有傳統中國Feel。下身為繡有蝴蝶刺繡嘅棉裙，手工精細，整套只賣$139十分超值。
台灣BAOCHYI公司出品，胸口繡有一對鴛鴦圖案嘅小鳳仙裝，有粉紅及紅色兩色任擇，最受女孩子歡迎嘅服飾。整套衫連褲以絹料夾棉製成，夾棉既薄身又保暖。
呢set套裝真超值，全套包括一件織錦棉背心裙、白色海虎毛披肩，以及有一頂毛毛邊絹帽及手袋仔一個，售價都係$169，除咗農曆新年之外，去飲宴都可以係呢個Look㗎！分8、10、12號碼，3至7歲嘅女孩就至Fit。
中國旗袍服飾之中，女童裝以清朝嘅格格服飾最受力捧，唔信？不妨新年期間上街數數你就知。由台灣BAOCHYI公司出品嘅格格Look服飾，分別有紅色及粉紅色，個人認為女童着粉紅色最cutie，且愈細個愈可愛。全套衫以夾棉製成，衫上印有織花圖案，除咗靚靚之外亦一樣夠暖。
全套馬褂均有龍字及金龍圖案，真真正正有「着上龍袍都似太子」嘅感覺。另有紅色織錦小背心、卜帽及一條髮辮，呢套清裝馬褂男童服，的確令小朋友更加活潑可愛。且全棉製造夠晒保暖。
台灣BAOCHYI公司出品嘅一套棗紅色男童唐裝，雖然有點似個利是封，但勝在夠紅彤彤，有大富大貴嘅感覺。一套有4件，一件繡有金龍獻瑞圖案嘅小背心，一件長衫及一條長褲，另附送一頂卜帽。全部以絹料夾棉縫製而成，手工不俗，如果BB夠1歲大而約有11kg重量的話，80cm嘅尺碼就啱身。
男孩子嘅服裝來來去去都係金色，經常扮作皇帝或富家子的確冇乜特別。呢套長衫連長褲男童裝則少有地用上藍色，但衫上一樣有金龍織錦圖案，且玩埋摺袖款式反出金色絹料，外觀睇落一樣咁儀表不凡，直情有「十二少」嘅影子。
穿呢類傳統服，又點可以冇中國嘅民族鞋仔畀小朋友嚟配襯呢？由日本POLANO製造，以金絲線做成嘅懶佬鞋款，襯金色男裝傳統服就最一流。雖然鞋嘅物料唔算高級，但鞋底以生膠做成，所以十分矜貴；共有全金色及金啡色選擇。
一對非常傳統嘅女裝繡花鞋，鞋面以絹布製造，而每對均繡有蓮花圖案及金線作點綴，備有紅色及粉紅色選擇，用嚟襯紅彤彤嘅旗袍衫簡直一絕。
電話：23379810
地址：九龍樂富樂富中心3樓T19A號舖
電話：28846888
地址：太古城康怡廣場