常說女人有兩個胃，第二個胃是預留給甜品的，正餐吃得再飽，也不影響女人吃甜品的心情。三位女子Chris、Josephine和Marrisa深明甜品對女人的魔力，同時要顛覆甜品作為副食的傳統心態，決心在甜品界闖一番事業，生下了「甜森林」。這間小店的誕生，還包含三個女人背後開店的故事。
記者：邵超 攝影：陳盛臣
三位女子Chris、Josephine和Marrisa相識不過是數年間的事，但Chris的丈夫認識了Josephine的丈夫和Marrisa的哥哥已很久，甜森林最初也是由他們六人一次聚會而起。六人中，Josephine的丈夫和Marrisa兄妹皆是五星級餐廳的廚師，經營一間甜品店可謂綽綽有餘，只是三個大男人太忙，由妻子及妹妹站在前線，安心做其背後的男人。
全力整中式甜品
Chris在甜森林主力負責行政工作，店舖主要由Marrisa執大旗。
「我唔識整甜品，淨係負責食。」
其實Chris當然不只是分擔食的工作，還要為甜品店方向而憂心。
「甜森林最初走錯咗方向，不過我哋有個好好嘅甜品師傅Stephen，佢睇過我哋嘅餐牌後，指出我哋唔應該賣一啲人有我有嘅甜品，當時真係好似當頭棒喝。」
廣集善言，現時甜森林集中在中式甜品上花心思，還供應酒店水準的午餐。
「好多人鍾意甜品店，有時會想喺呢度食到餐點，二樓如果有包場搞派對，都會供應套餐，主要由彭師傅負責，佢有多年五星級酒店意大利餐廳工作經驗，𠵱家午餐已吸納到一班常客。」
Chris更寄望將來可以搞甜品私房菜。
在港開店求滿足
Marrisa是三個女子當中唯一的廚師，移民澳洲後一直在當地任職西點師傅，想不到去年跟哥哥回港探朋友，竟會決定留港開設自家店。
「我喺澳洲做賭場嘅西點師傅，生活好安定，環境同空氣都好好，以前訂料打電話通知採購部自然有人代勞，大公司更會有Sales送上門兜生意。𠵱家喺香港樣樣都要識，最初有啲唔習慣，但辛苦之餘都有另一種滿足感。」
正所謂做嗰行厭嗰行，Marrisa卻沒有這種心態。
「甜品係一門幾深奧嘅嘢，要有不斷去探索、學習嘅心，先可以創新、改進，所以唔會覺得悶。」
開舖想Update自己
Josephine的工作經驗是零，讀書畢業後便結婚，職業一欄一直寫上家庭主婦。
「做女仔嘅時候掛住拍拖，結婚後留喺屋企打理家務同照顧仔女。移民澳洲後，我間中都有做兼職，怕跟社會脫節。𠵱家仔大女大，喺屋企好悶，於是諗住開舖頭，雖然做唔到自己嘢，不過都可以Update吓自己。」
Josephine在甜森林主力負責樓面工作，學習做一個職業女性。
牛尾腍兼吸盡汁料
甜森林其中受歡迎主菜，先將牛尾煎香，再落紅酒燴，待酒味蒸發，落茄膏、雜菜、香草再燴牛尾至腍，牛尾汁盡吸精華，令牛尾更加好味。
7成熟先有咬感
Chris最初試彭師傅這碗麵，還以為意粉唔熟，其實煮至七、八成熟的意粉才有咬感爽口，加埋海鮮，令人吃不停口。
醃過夜翌日再焗
是大廚花兩天才有得吃的甜品，麵包浸牛油和用蛋水混和Rum酒和Rum味提子過夜，翌日再取出來以焦糖焗底，配以酸甜味的雪糕，之前都未食過呢款味道。
9點出爐限賣20客
這個栗子焗西米布甸，每晚九時至十時出爐，限賣二十客。焗成金黃的西米絕少燶面，和着栗子茸吃，皮腍內軟，冬天吃特別覺得溫暖可口。
甜森林
地址：中環歌賦街44號地下
電話：28513820
營業時間：12:00pm-12:00am