粗略計算，香港人口有六百七十七萬，勞動人口有三百五十一萬，減去失業人士二十六萬，即係就業人數共三百二十五萬，佔總人口四十八巴仙。
咁多人打工，但只有一萬三千人以薪俸稅嘅標準稅率百分之十五交稅，真係少得可憐，萬三人，即係總人口嘅零點一九巴仙，就業人數嘅零點四巴仙。比例微不足道。
左丁山啲老友記，尤其是啲賓架，人人都係呢零點一九巴仙嘅人上人。可喜可賀。同賓架L講起，佢先挑一聲，跟住嚡一聲，然後講：「淨係睇統計數字，我算係人上人啦，一萬三千人之中嘅一個，係香港精英中嘅精英，相信大部份日日都喺中環撞口撞面。但我哋唔覺得富貴噃，只係為子女為層樓為架靚車捱餐死，香港冇理由靠我哋呢一萬三千人支撐大局啫，阿松又話加稅，所謂共同承擔，其實即係一萬三千人承擔，我真係想搞一個『標準稅率納稅人協會』，睇吓有乜辦法維護自己利益。」
能者多付，係公共財政學之中關於納稅嘅一個理念，但係外國好多人納稅，個別稅務負擔較輕；香港咁少人納稅，個別稅務負擔好重，難怪啲「能者」××××聲，覺得唔公道。外國稅率雖然比較高，但美國加拿大人年入二十萬美元，已經好掂，香港年入一百五十萬港銀，一啲都冇富有嘅感覺，只會覺得俾政府㩒住劏。