美股上周五唔掂，人人都估中港股昨日冇運行，恒指最低時下挫112點，埋單計數只係唔見62點，而期指則微跌31點。
個別股票一早就有人維持秩序，例如中信泰富（267）最差時都只係微軟15仙，見15.40元，下晝有大手照價剔場面，收15.85元，有30仙升幅。有心人做嘢，唔會咁短癮，短炒揀Call輪，都係要上周六推介嗰隻9298，隻輪現價4.2仙，溢價15.5%，槓桿率37.7倍，溢價唔低，但有槓桿率勁爆戥住，更重要嘅係6月杪至夠鐘，唔怕咁快輸溢價，有得博大堆。
恒指由上周三最高9892，至昨日最低9501，總計唔見391點。連跌3日，係時候有啲反彈，可博恒指Call輪，兩件可以諗吓，就係9552同9663。
地產股昨日唔得，恒地（012）、新地（016）同長實（001），依次序跌低2.8%、1.5%同1.5%。「代表」Call輪中，恒地9473散29%（曾散35%），新地9525散32%（曾散50%），長實9517散29%（曾散47%）。呢3件Call輪，有機會喺正股反彈之時彈高啲，但溢價唔細，時日無多，最終都會係咁先，可當賭錢細注博反彈，咪坐盤，坐盤就要準備不久之後得番1仙求沽。
章盛