重有十零日就到農曆新年，唔少媽咪都已經開行Turbo忙住做糕，雖然話就話自己屋企整一定足料，但款式來來去去都係得嗰兩、三種，有時都咪話唔厭。老實講，論創意又真係唔及得上出面酒家餅店炮製的糕點咁過癮，好似今年推出的新派年糕，論口味有炭燒咖啡味、楊枝甘露味、蓮子味、紅豆味，夠晒破格；論材料又有黑松露菌、松茸、燕窩等，夠晒上等矜貴，打破年糕一直以來的悶蛋形象。
記者：尹珊珊
攝影：陳穎、周旭文
ImageGirl：王穎
中西合璧夠矜貴
叫得上「黑鑽石」之稱號，呢粒來自法國的黑松露菌身價絕對矜貴，外表雖然睇落其貌不揚，但其味道之香，猶如會發出熱力一樣，只要將薄薄的幾片放進菜餚上面，甫端出來，香味瞬即瀰漫於一室中，更何況蘿蔔糕本身已充滿瑤柱、冬菇、蝦米、臘肉等材料，再將新鮮原粒黑松露菌鋪上面，一打開盛載的鐵盒已遠遠聞得到。金裝美食禮盒同時附有2両鐵觀音，6條臘腸，以及6條用鵝肝做嘅膶腸，夠晒名貴，送禮都唔失禮。
口感煙韌無黐牙
基本上製法同普通年糕無咩分別，材料一樣有黃糖、糯米粉同澄麵，只不過將巴西咖啡豆磨成咖啡水，再溝埋日本炭燒咖啡粉，代替本身水的份量，就可以製成呢個新口味的炭燒咖啡年糕。味道方面，帶有濃郁的咖啡香，但又唔會覺苦，糕身亦相當煙韌，有少少彈牙，唔會黏到滿嘴都係，值得一讚。
楊枝甘露最有睇頭
加有上海糖桂花製成的馬蹄桂花年糕，有桂花的天然香味，馬蹄片咬落甚有口感，而且全賴師傅撞漿撞得靚，粉同水的斤両亦調校得好準確，煎出來無一般馬蹄糕咁實、咁易散。至於楊枝甘露年糕最大特點係完全唔似年糕，從雪櫃取出就食得，製法同平時食開嘅楊枝甘露無乜分別，主要都係西柚肉同芒果肉，由於每個年糕足足用咗兩個大泰國芒果，食落啖啖肉，又無年糕咁膩滯，一個人都可以食得晒成個，女孩子要切記忍口。
菇味最濃
松茸菇有名你叫「蘑菇之王」，自然有價有市，聽聞高峯期身價要成三千幾蚊一公斤，特點係味道奇香，而日本人就相信佢具有抗癌作用。雖然呢個松茸菇菌糕唔係用新鮮松茸，但係成本都唔平，再加埋白靈菇、杏飽菇及秀珍菇，菇味勁香，未煎之前已經聞得到，而松茸本身香味獨特而持久，更令人完全感受到齒頰留香的真正意思。
素食者之選
鮮百合就係阿媽平時用來煮齋的材料，具清熱寧神、潤肺止咳的功效，而清甜滋潤的椰青肉有豐富的蛋白質，入口椰香四溢，估唔到將兩者合二為一做出來的糕點，唔會九唔搭八之餘，味道都幾特別，甫上桌先有陣陣椰香味，食落有粉粉哋的百合肉，最過癮係椰青肉，質地滑潺潺咁，比起同樣係甜糕的馬蹄糕多一份新鮮感。
健康之選
愈來愈多人講究健康飲食，所以今年唔少賀年糕點都不約而同用健康做賣點，好似呢個健康蘿蔔糕，是以鮮草菇、鮮蘑菇、冬菇取代傳統的臘肉，好處係食落無咁肥膩，同時可以為素食者提供多一個選擇，不過顏色就較為偏白，賣相唔及一般蘿蔔糕夾雜啡啡紅紅咁好睇。
𡁻頭最勁
糕身呈少少粉紅色，質地亦比黃糖年糕軟身，至少未煎香之前唔會成嚿磚頭咁硬實。味道方面，椰汁味都幾濃，並夾雜了紅豆的香味，口感軟滑得來又有紅豆的爽脆，夠晒𡁻頭，相信女孩子會比較鍾意食。
售賣點
Teca（28336083）
地址：跑馬地成和道45號1至2樓
供應日期：即日至1月30日
天與地（23678428）
地址：尖沙嘴諾土佛台6號地下及1樓
供應日期：即日至1月31日
翠亨邨（23686363）
地址：尖沙嘴彌敦道132號美麗華商場地下
供應日期：即日至1月31日
麥萄坊（26226156）
地址：九龍太子道西193號帝京酒店2樓
供應日期：即日至1月30日
備註：沙田帝都酒店糕餅店同時有售。