商業機構若果能夠有一幢以自己公司名命名嘅寫字樓，係咪覺得好威呢？因為唔單止係身份嘅象徵，重可以提升公司知名度。寫字樓命名權罕有，唔係間間公司可以擁有，但係𠵱家每個月唔使十萬蚊，就有寫字樓用兼有命名權，又值唔值呢？
美聯物業香港商業部高級經理周永亨對蘭西講，上環干諾道中嘅豫泰商業大廈，𠵱家有八層樓面招租，若果租五層以上，就可以擁有大廈命名權。業主要求租期係三年或以上。
不過，租約期滿後，命名權就要畀番業主。
由美聯代理嘅八層樓面，全層千四至二千三呎，低層月租每呎八蚊，免租期六個月，計落實際呎租只係六蚊。而高層呎租十一至十二蚊，實際呎租八至九蚊。就算用面價計，租五層每月租金都唔使十萬。
豫泰商業大廈樓齡八年，一層一伙，設有獨立洗手間同獨立冷氣，管理費每呎兩個八。𠵱家嘅租客有會計師樓、律師行同貿易公司等。
呢幾年樓市咁差，好多代理都做到冇癮，唔知點樣面對逆境？利嘉閣噚日嘅月會，請嚟香港單車好手洪松蔭，講吓佢嘅逆境自強之道。
洪松蔭話自已細個時好窮，佢一直都冇放棄過，日頭返學，夜晚做兩份兼職，先至儲到錢買架二手單車，展開自己單車比賽事業嘅第一步。
發展商𠵱家賣樓，唔單止要度橋推銷物業，連搵地方搞記者會都𢱑穿頭。香港地各方美食薈萃，要軟銷樓盤，點少得飲飲食食。
好似九龍建業，聽日就搞記招飯局，講吓今年嘅重要發展計劃，同租售市道前景，地點喺查大俠（查良鏞）個仔查傳倜開嘅私房菜館，有別平日經常喺酒店嘅拘謹感覺。不過，講到城中出名識享受猛人，就一定要數電盈嘅李智康嘞。
房委會點樣處置手上批私人參建居屋單位，近期突然成為發展商最關心嘅事項，幾個發展商都話有興趣想買，重提出唔同嘅建議。主流意見係招標出售，咁先至夠公平喎。
發展商爭取到要政府停賣居屋同停賣地，之後就積極去搵土地儲備，𠵱家連居屋都話想買，然後增值轉售，唔通唔怕供應過多，影響樓價咩？
政府賣就影響樓市，但發展商賣就冇事，發展商嘅思維真係難捉摸。
佢哋以前嫌居屋無肉食，不願沾手，𠵱家又想轉吓手就賺個盆滿砵滿，但世事未必會咁如意。
九龍倉為促銷尖沙嘴擎天半島二期，搞咗個「寰宇之旅」大獎，先後送出三個國家嘅旅遊獎項，結果全部俾美聯啲客攞晒。
今個月一號抽出最後一個獎，係澳洲悉尼動感之旅，價值兩萬蚊，由一名廠家奪得，佢以五百九十萬買入一個千四呎單位。之前兩個旅遊獎係去法國巴黎同英國倫敦，由同一家代理行嘅客攞到。
另外，美聯九龍區營業董事羅國安話，集團九龍區今個禮拜四會食團年飯，喺尖沙嘴逸東酒店逸東軒擺近四十圍，預計要十幾萬找數，不過，公司、佢本人同埋一班高層齊齊夾錢。
佢話今年會嚟一次大突破，就係首次會有歌星獻唱。羅國安話，今年九龍區多盤開賣，同事辛苦咗成年，所以好應該慰勞佢哋。
近幾年全幢物業買賣個案，佔咗投資物業市場好大嘅比例，中原為加強呢方面業務，特別成立一個項目投資部，重請咗猛人主持大局。
蘭西收到料，新揸fit人叫司徒德樂，之前喺地政總署同地產公司做過。點解會請佢？皆因佢喺地政總署時，主要研究地皮轉換用途，𠵱家咁多投資者買咗物業後，都考慮改變用途，由佢負責就最啱！
蘭西
電郵地址：
