行入零食舖買「口立濕」，飛覺有個鬼佬在近門口處係咁昅實我，睇真啲個鬼佬幾靚仔，有鬍鬚、雙手插袋、笑口淫淫，睇睇吓重覺得有幾分面熟，咦？乜原來係碧咸。
一比一比例的紙板碧咸在硬銷某品牌的糖果，相信女球迷們見到萬人迷插住褲袋笑得咁潮氣，就算纖緊體都忍唔住啪番兩粒朱古力當捧場。
運動明星的身價應已遠遠超過了電影明星，聽聞朗拿度在世界盃期間的超凡表現挽救了以一剔作標誌的運動用品跨國企業，運動員替品牌賺到錢，自己當然亦會分到錢，重要係好多錢。
除了做代言人乾𢭃人工之外，又聽聞朗拿度本身亦係商業奇才，成立了球員經紀公司，肥水不流別人田。運動壇上的商業奇才應以米高佐敦為表表者，好波之餘又識搞球隊、又識出波鞋，一路練波一路用免手提電話開會，真乃神人也！
好在中國都唔輸蝕，有個李寧。在北京逛百貨公司，李寧牌的運動產品必然佔去了很大的位置，細看其產品，無論質料與手工都有水準，款式更是毫無土產味，難怪深受同胞歡迎。李寧牌如果以目前形勢繼續邁前，相信不久將來，香港的年輕人雜誌定必會報道李寧牌邊款波鞋炒得過，定了這個「型」位後，嘩！十幾億人口的大市場，發過豬頭。