鄭希怡（Yumiko）因為俾人叫「龍嫂」，搞到冇乜邊個男士敢向佢展開追求，唔通啲男人唔驚得罪大哥，俾人話佢撬大哥牆腳咩！不過，有個人就乜都冇有怕，竟然公然向大哥挑戰，話好鍾意Yumiko喎！呢個就係東華前主席、無綫藝員王賢誌個老竇王忠桐啦！
話說早排楊受成請鄧光榮同王忠桐成班朋友去英皇駿景酒店傾偈飲酒，重搵埋佢旗下嘅Yumiko撐場，點知王忠桐飲咗幾杯之後就語無倫次，捉住Yumiko猛同佢講，話好鍾意佢喎！嚇到Yumiko死死吓。好在王忠桐後尾補充咗句，話想娶佢做新抱，即係嫁俾佢個仔王賢誌咁解，如果唔係俾佢老婆知道嘅話，實扭佢耳仔都有之。
呢件咁瘀嘅事，王忠桐梗係唔會話畀自己啲仔女知啦，但好衰唔衰過咗幾日Yumiko撞見王賢誌，重話畀佢聽當晚件事搞到好尷尬，王賢誌先至知道老竇啲瘀皮嘢咋！
陳敏之、Rosemary同李嘉慧等噚日去咗尖沙嘴鷹君酒店行catwalk，Rosemary透露遲啲會行四十二公里馬拉松，佢話：「喺一個月內，每日行一、兩公里去完成，係好好嘅減肥方法，因為𠵱家啲model好瘦，我都想瘦啲。」問佢怕唔怕胸部縮水？佢話：「我嘅cup數（杯位）冇變，但尺碼就細咗，呢方面我幾lucky，一瘦就先瘦條腰，之後到hip同個胸。」
薛家燕（好姨）噚日喺西九龍中心擔任「香港單親協會」開幕禮嘉賓，好姨即場與台下觀眾分享自己婚姻失敗嘅經歷，同埋點樣教導仔女喺單親家庭成長。好姨話：「其實我個仔都俾人笑過問佢爹哋去咗邊，我就叫個仔唔使難過，重叫佢同人講爹哋同媽咪已經離咗婚，𠵱家爹哋就唔喺香港嘞。」
趙頌茹（阿Yu）同蕭正楠（Edwin）噚日去黃大仙出席「人人平等騰龍墟」活動，當記者要求佢兩個影合照時，阿Yu竟然好抵死咁對住Edwin講：「我同你合照怕唔怕關心妍嬲㗎！」Edwin聽後就惟有笑一笑。Edwin話自己同阿Yu好friend，所以佢都知道對方喺度講笑。
劉德華同張達明日前喺馬來西亞為新片《老鼠愛上貓》做宣傳時，佢哋大爆栢芝有一次喺北京拍戲時懷疑出現「失常」嘅舉動，華仔話：「我好佩服栢芝好抵得冷，就算幾凍，佢都堅持唔加衣同披肩，栢芝話怕整皺件真絲戲服。」張達明就話栢芝成日請佢哋食飯，重成日爭住畀錢。
余文樂、盧巧音（Candy）同黃家強呢三個緋聞男女噚日喺沙田公園出席保良局活動，由於Candy只係主持開幕禮，唔使上台唱歌，所以佢同樂仔、家強冇機會接觸，反而曾經暗寸過樂仔係𠝹女王嘅家強噚日就同樂仔搭膊頭影相，重猛叫記者唔好再提𠝹女王一事，而樂仔就話：「我哋唔係仇人嚟㗎，之前只係誤會，總之冇仇人，唔使愁，輕鬆晒，冇交嗌。」
