早前講過唔係有咁多舖頭入部SonyEricsson嘅P800，不過近日去先達行個圈，發現有唔少舖頭已經返咗貨，但仍然都係水貨英文版，有啲舖頭就標價$5,XXX，有啲話特價發售，行勻全場機價大約徘徊喺$5,880-$6,380。水貨到，怕且行貨就返，但據聞行唔會喺香港出英文版，一出就會係中文版，不過，要等到3月先至有，若然係真，頭頭尾尾真係等咗半年。
T500比舊作A400更稱得上係女人機，紅色機身兼測月經及卡路里功能係指定動作，機面屏幕外框更鑲埋鑽，開機畫面亦有玫瑰花，百分百女人機。三星水貨機開價例必貴，要成五千幾蚊，有65K色同40和弦都係假。另外，三星部A800最近有部藍色登場，開價唔算貴，千八、九左右，功能就好一般嘅三星機：雙芒、16和弦鈴聲、WAP、EMS同遊戲，較特別係機面有7色來電閃燈。
Tony唔單止係男仔英文名，亦係一個來自韓國較冷門嘅手機品牌，最新型號就有部T99，雖則較冷門，但功能又唔算弱，有齊時下至興嘅65K色彩芒同16和弦鈴聲，至於機面嘅半透明外框，原來唔係得個樣，查實係來電閃燈，不過$2,500買部咁冷門嘅機，又未必諗得過。
上星期尾行經各大台嘅門市，發現間間都貼晒大字報話免SIM卡費同埋免轉台費，不過有啲就寫住「只限今日」，其實呢啲都係拉客嘅招數，等大家以為真係最後一日，於是乎就「拿拿臨」轉台。不過好多時隔幾日呢個優惠依然有，家陣咁嘅時勢慳番一百幾十固然重要，但亦唔好太過心急，行多幾間格吓價。
文：羅新基