澳洲網球公開賽開鑼，唔使返工或者最近加入雙失行列嘅網球迷一起身就有波睇。𠵱家睇網球賽，除了睇球技之外，重可以睇時裝，參加澳洲公開賽的運動員穿得尤其輕鬆，男仔就圓領T恤加一條愈嚟愈闊嘅三個骨短褲，女仔們就五花八門，有性感、有密實。
撇開球技，單講視覺上的心頭好始終是古妮高娃，唔見一大輪，馬尾依然，身形方面好似更見豐滿。真係唔明，照計呢一類世界級球手，每日應該刷完牙就練波，練到太陽落山至返屋企瞓覺，點解重會有本事生到周身係肉？古妮高娃這次亮相穿的是一件小上衣，露出一條大蠻腰，肉騰騰走嚟走去，虎背熊腰，腰馬合一，正手抽擊，板板有力。相反的是威廉絲姊妹，一身橫練的肌肉，黑色皮膚泛起光澤，配襯鮮黃、紅、橙色戰衣，搶眼得不得了。威廉絲姊妹體能一流，信心爆棚，加上上網攔截抽擊時面目猙獰，對手經常被嚇窒，照睇該有排稱霸網球壇。
不只網球，其他球類運動的球衣都已大變身，例如排球衣已變成第二層皮膚，尤其適合南美球員穿着，益發顯出黑色橡膠的魅力。世界每日不停變，有時睇番以前嘅足球賽事，發現條波褲實在係窄得緊要，好似明明係啱但偏要着細一個碼，屁股被繃得緊緊的，帶住個波扭來扭去，喜歡者可能會覺得性感，我則不太懂得欣賞，踢波咁豪邁，都係着番條大啲嘅波褲好睇啲。