世事往往很玄妙，一杯茶除了要泡出茶味香之外，更可泡出了隔代情緣！梁生及公公相差數十年，但經歷的事業運程竟然不謀而合，相信除了解釋是隔代遺傳之外，不然就是遺傳因子的影響吧！
記者：陳冰麗 攝影：周旭文
踏入「緻好茶館」，被內裏的優雅布置吸引，牆上掛有幾幅中國瓷畫及字畫，中式酸枝枱椅，好中國化；但一幅落地玻璃門，將街景盡收眼內，卻有點露天茶座感覺，不同的是中國茶香充斥全間茶館。
梁先生在八二年由做布起家，前後二十二年，其後因中港融合，大部份布廠都北移，以致生意愈來愈少，就是這樣造成梁先生需要轉型的因由。因為做布時經常往返內地，見到不少茶館，可能是體內的遺傳因子的影響，亦學阿公一樣決定自己開一間茶館。梁生娓娓道來：
「決定開茶館後先發覺我同阿公走條路原來係一樣，阿公幾十年前亦係做布，後來至改行開茶莊，嗰時開始我就好鍾意飲茶，鑽研茶學問都係最近十幾年嘅事。」
梁先生話阿公生前喺上海街經營嘅「香棧茶莊」雖不在，但「香棧茶莊」四個字至今仍刻在舊址的外牆上。
茶葉種類幾十種，各有不同味道，問梁先生至愛，即刻話最鍾意飲鐵觀音，貪佢清香又令喉嚨好舒服。飲茶初哥，不妨也先來一壺鐵觀音，清香的茶味，配合奉送的涼果，一絕！他覺得飲茶是一種享受，要令到顧客好似喺屋企飲一樣：
「一般要用紫砂壺泡茶，又要先暖壺、後暖杯等繁複工序。我將佢化簡，改用耐熱玻璃壺代替，透明玻璃壺好處係可以即刻見到茶湯色澤，即刻知道茶濃淡程度，工序簡單，同樣可以泡出一壺自己心水嘅靚茶。」
雖然這裏的泡茶器皿是玻璃壺，但客人亦可以要求用紫砂壺。
梁先生的家鄉為新會四邑，所以茶館內部份食物更源自家鄉風味，如煎魚餅、芫荽魚片粉葛羹，他稱這兩款家鄉食品都是細細個跟阿媽學，其他食物以點心為主，以清淡而不肥膩為賣點。梁先生說：
「飲茶比咖啡有益，多飲綠茶更有防癌功效，綠茶含兒茶素，頭一、二泡嘅綠茶最有益。近年歐洲人更流行飲普洱，消滯功效最好。」
據梁太講，自從老公開茶館後，亦愛上飲茶，而且愈飲愈上癮。
「我先生留喺香港打理茶館，我就要照顧兩個住喺加拿大嘅仔，喺加拿大發覺唔少外國人都有飲茶嘅習慣，部份年長嘅更因為飲得茶多，間中有返香港買茶葉，所以飲茶嘅文化喺外國亦都好普及。」
原來老闆梁先生說，為公諸同好，在「緻好茶館」眼所見從世界各地買回來的裝飾品以至枱椅，只要顧客喜歡都可以賣給他，價錢可面議，但梁先生希望客人到此始終都是以飲茶為主。
緻好茶館
電話：31040890
地址：中環蘇豪伊利近街17號地下
營業時間：11:45am-12:00mn
付款方法：現金/信用卡