經濟不景，大部份打工仔都面臨裁員或者減薪，政府各部門亦不斷諗計仔慳啲使，有人大叫要削減社會福利撥款同埋綜援開支，搞到社會上嘅老弱孤寡個個有得震冇得瞓。
蘋果日報慈善基金轉眼間同讀者共度咗七個寒暑，𠵱家經濟唔好，但係讀者嘅捐款仍然有增冇減，呢種不離不棄嘅精神，實在令大使深受感動。
為咗善用讀者一分一毫嘅捐款，上個禮拜，蘋果基金得到香港社會服務聯會嘅協助，搞咗一個「伙伴同行分享會」，出席嘅有：蘋果基金愛心基金委員會主席許賢發太平紳士、基督教家庭服務中心總幹事邱可珍太平紳士、同埋壹傳媒集團財務部及及法律部兩位董事成員等，共有六十二間社會福利機構差唔多一百人出席。其間，發叔指出𠵱家經濟咁差，好多機構都資源不足，所以呢次聚會係希望畀機構了解申請基金資助社會服務計劃嘅詳情，等佢哋多啲申請。發叔公開呼籲：「我哋會優先資助切合社會需要嘅好計劃，希望直接幫助到更多弱勢社群。」基金總幹事則詳細講解機構點樣同基金建立夥伴關係去幫人，以及基金一直穿針引線商界參與社會服務嘅工作。
會上大家都踴躍提問，希望知道邊一類計劃最有機會獲批，同埋申請撥款嘅詳情。委員會每年舉行四次會議去審批大家嘅計劃書，最快會喺三月底開會，大家記得要留意暖流版嘅報道。
暖流熱線
電話：29908688
傳真：23702192
電郵：
網址：