新年着新衫係中國傳統習俗，貪靚的型女Celina亦都唔例外。為免披住全副武裝上陣，容易俾人錯認以為着緊古裝戲服，Celina主攻設計經過改良的新派中國裝，以洗脫傳統過年衫予人娘氣的感覺。𠵱家就等Celina聯同寵物咩咩羊仔，率先演繹新一年的應節賀年衫。
記者：尹珊珊 攝影：陳陶鈞
ImageModel：Celina、發聲咩咩羊仔（上品堂提供23855884）
唔好以為花花圖案一定娘，就以呢件有如百花齊放的雙面棉襖為例，顏色鮮豔得來卻又唔俗氣，待新年過後又可以反轉純黑色一面繼續着，唔怕浪費，加上質地厚且緊身，着落唔會顯得太臃腫，襯藍色牛仔褲就最靚。
穿着全套中國傳統服裝可能太誇張，小小的一件繡花背心反而令人受落。呢件衫身用紫、藍、金線繡有傳統碎花的全棉背心，斜襟的領口位綴有繩結鈕扣及毛毛圍邊，簡單地配襯貼身上衣及牛仔褲經已很好看，新年時着住同長輩拜年，包保利是都可以𢭃多幾封。
呢件充滿中國味道的紅色長褸，衫身繡滿閃令令的玫瑰花圖案，配合衫邊的啡色毛毛及挺身的公主領，感覺高貴大方，又具有節日氣氛，要全場矚目話都無咁易，不過話明係長褸款，冇番咁上下身高都唔好着。
呢件紅彤彤勁搶鏡的絲棉中褸，企領位及衫邊均圍有黑紅相間的貂鼠毛，顏色望落的確有幾分娘，但係加埋衫身前後繡有的貓貓圖案，整體感覺即刻YoungLook很多。但由於剪裁較為闊身，着上身容易令人有種臃腫的錯覺！
大紅大紫唔係人人都受得到，相比之下，呢件粉藍色冇袖全棉背心無疑柔和得多，蝴蝶刺繡亦比花花圖案更能討少女歡心。衫身綴以一條黃色彩帶，在強烈的深淺色對比下，效果搶眼悅目，以黃色假水晶代替中國繩結鈕扣，設計獨特之餘，更能一洗全棉繡花背心予人娘氣的感覺。
自問身上沒有丁點多餘肥肉，不妨挑戰呢件薄身的粉紅色入膊旗袍。剪裁極之貼身，盡將女性玲瓏浮凸的身形表露無遺，而且粉紅色一向容易令人顯得肥胖，如果有條件穿着，簡單地襯條深色牛仔褲經已可以靚絕全場。
款式似小鳳仙上衣的織錦棉襖，斜襟的領口位用上別致的繩結作鈕扣，衫邊另縫有拉鏈方便穿着，修腰剪裁的設計，着上身唔怕臃腫。雖然深啡令衫身真絲面較為沉色，但面層繡有唔同顏色的雙魚圖案為主，意頭十足，足以彌補此缺漏。除有少量現成貨之外，重可以度身訂做，另十多種布料可供選擇，需時約5至7日，如果𠵱家落訂重趕得切過年着。
設計較為清簡的全棉上衣，以杏色壓紋棉布繡上金線作裝飾，再配上金色的繩結鈕扣，款式清雅脫俗，容易配襯。由於上衣底部縫有一層厚棉，質地暖身，天氣漸冷都抵得住，不過卻略嫌衫身頗為墜手，擺放時最好摺合在衣櫥內。
紫色雙袖外套，內襯青色無袖背心，加埋衫身車工細緻的花卉刺繡，呢套清朝格格Look絲質套裝，無論顏色和款式都甚為誇張，着上身遠一遠都俾人見到你，冇番咁上下勇氣真係唔敢着。
ChinaLook？NoWay！
打扮入時的基絲汀一聽到着中國衫，即刻斬釘截鐵咁話：「一定唔着，死都唔着，咁老土點着喎！就算個款好in都係咁話。」
睇款至上的Suki態度較為中立：「要睇吓係咩款先，好似金色長袍、旗袍呢類咁誇張的款，自己就真係接受唔到，如果係棉襖都重可以。」
品味相若的Maggie同Clare，齊齊異口同聲咁話：「中國衫未必會買，但係鮮色衫就一定會，一來自己本身都好鍾意，二來大紅大紫的衫始終比較應節，夠晒新年氣氛。」
售賣點
滿清皇朝
地址：旺角通菜街2號K地舖（近登打士街）電話：27814998
KANDI
地址：銅鑼灣記利佐治街1號金百利商場1樓868號舖 電話：28084423
森林
地址：銅鑼灣記利佐治街1號金百利商場2樓228號舖 電話：28816910
micah
地址：銅鑼灣記利佐治街1號金百利商場3樓323號舖 電話：28084413