長實早日搵近年人氣急升嘅命理家楊天命，到設喺紅磡嘅長沙灣泓景臺示範單位，為參觀者算流年，批吓八字，重預測埋樓市㖭。
長實執行董事趙國雄似乎對楊生手上嘅羅盤好感興趣，唔知係咪想偷師，學番兩三招，等第日可以同記者講風水命理，多個話題，唔使成日講毛語錄呢？
楊生話今年樓市只係平平穩穩，跟住幾年就會愈嚟愈好，到07至09年重會到高峯㖭。佢重話今年買西南向水嘅樓最好，好似長沙灣、九龍站、奧運站同薄扶林數碼港等，都好合適喎。噫！今年呢幾個地區都有好多樓賣，唔知楊生會唔會執番幾件，守佢幾年嚟印證吓自己嘅功力呢？
另外，楊又同啱啱升咗做長實高級營業經理嘅黃思聰批流年，叫佢要「老老實實」做人。原來係指唔好去投資啫，因為唔利佢。黃生一路聽一路猛點頭話好準，話之前唔見咗好多。唔知楊生有冇算吓佢羊年會唔會再升職呢？
發展商賣樓愈嚟愈唔易，畀錢搭個靚靚示範單位已經係指定動作，重要搞嘉年華同度優惠付款法。為咗搞氣氛，信和喺屯門搭建嘅元朗帝庭居示範單位，就請咗名女模，着住英國宮廷服飾，喺現場走動，當然謀殺咗唔少菲林啦，此無非博報章雜誌刊登，以增加樓盤曝光率，認真好計。近嚟已經愈嚟愈多發展商用呢招，請模特兒喺售樓處扮鬼扮馬，引人注意。
嘉華地產擺咗兩部跑車喺嘉皇臺，蘭西梗係叫嘉華呂耀華坐落去扮吓車神啦。原來想做車手，要先瘦身，因為坐位好窄，呂生咁高大威猛，差啲坐唔到落去。
另外，攝影大師水禾田，早排幫嘉華地產嘅九龍塘嘉皇臺拍咗輯攝影集，雙方合作愉快。身為香港福幼基金會董事嘅水禾田，借用嘉皇臺會所一隅，上個禮拜六起一連七日，舉行「鏡花水影水禾田攝影展」，又捐四十幅作品出嚟賣，包括三十五張相同五幅佢畫嘅畫，為基金會籌募經費。其中二十五張相係啱啱去完絲綢之路，喺鳴沙山影嘅。
聽水禾田講，以為唔係好凍，冇點帶禦寒衣物，點知去到有成零下30度，重落雪㖭。佢講笑咁話，凍到以為對耳仔甩咗，不過拍攝到白茫茫嘅沙漠，亦十分值得。福幼基金會宗旨係幫助中國失學兒童重返學校，資助孤兒嘅生活同協助救災。
北京東方廣場嘅寫字樓東方經貿城，兩年內已經租咗超過一百七十萬方呎，差唔多等於一座中環國際金融中心二期（一百九十五萬方呎）。發展商上個月又推出第五期五十萬方呎樓面招租。
東方廣場有限公司董事長甘慶林話，東方經貿城錄得「三最」紀錄，就係最多大面積租戶，夾埋佔一百萬呎。樓盤又係最多日資公司承租，亦係最多跨國公租用。
最近進駐嘅租客有名列財富五百嘅韓國SKTELECOM，承租一萬呎、中國最大網站之一嘅網易租咗萬六呎，至於從事物流業務嘅香港匯杰集團，就租咗萬四呎。
重有十零日就到農曆新年，雖然大家對嚟緊嘅羊年唔係咁樂觀，但行經商場時，都會被新春氣氛感染，心情都好啲，皆因個個商場都有唔同嘅布置迎接新春。
地鐵旗下商場都各有唔同主題，好似荃灣綠楊坊就係「民族情意結」、九龍灣德福廣場以「五福齊來」做主題、柴灣杏花新城主打「浪漫桃花源」等。
為令商場與眾不同，地鐵重喺德福商場放咗個72吋乘36吋嘅大魚缸，裏面有八十八條「遍地紅」金魚，增加生氣同動感外，當然係寓意「年年有餘」。
咁啱太古地產嘅鰂魚涌太古城中心商場，都放咗兩個大魚缸，養滿錦鯉，代表「生財有道」。
蘭西
電郵地址：
