昨日跑長途馬王首關董事盃，趙飛雲與老友入場睇靚馬。老友極度睇好「奧運精神」，並話如果隻馬可以當資產注入中信泰富（267），股價肯定有刺激。結果「奧運精神」梗頸四，3倍唔夠嘅大熱Q死火。
其實跑馬同睇市有一個相同點，搵唔到缺點輸嘅大熱門馬或死Q，經常會過熱死火，情況好似全世界睇好大市升或跌時，市勢其實已逆轉，所以經常贏錢係少數人，輸錢係大部份人。
好似上周三之前，好多人對港股後市充滿憧憬，但美股上周連跌3日後，本周相信大部份人又轉為看淡後市。事實上，港美股市仍是上落市走勢，暫時無較明確方向，現階段入市難度非常高，有經驗炒家亦經常中招，現時炒輪只宜炒一兩日超短線或即日鮮。
美國今晚假期休市，淡友今日若要乘勢追擊好友，可以少一重顧慮。恒指若跌穿20日線，將要考驗去年10月底部延伸至今的升軌支持（現處9350）水平，能否守穩這條升軌，對恒指意義重大。若確認跌穿，將重展跌浪。
趙飛雲仍保持上周六的睇法，恒指跌至9350附近會有初步支持反彈，手上持有Put輪者宜先沽一半獲利，候反彈近20日線不破再補回，如果升穿20日線，Put輪餘數當然要先沽出計數。手上無貨者則可候9350附近博一轉超短線反彈，恒指Call輪可揀9663。
趙飛雲