昨日講到一位讀者問「李天命流年運程書」，左丁山一頭霧水，因為李天命冇寫呢啲書嘅。後來公關靚女阿美來電，於是問佢李天命有冇出過呢啲書。阿美笑到好大聲，佢話：「左丁山你out嘞，好似《飲食男女》捧過一個楊天命，係新進命相師，讀者實係搞錯，你自己唔識楊天命，證明你係老餅。」
原來如此，識唔識都冇所謂，乜嘢流行事物都要識得，精神會好疲勞嘅。另一位讀者Mac來電郵話：「網站中華里非常適合小學生，中學生可睇《燦爛的中國文明》（
讀者Chris問：「細妹可以去英國重讀中三，繼續升學，請介紹。」呢件事唔敢介紹，英國寄宿學校甚多，有貴族化，有比較平民化，學費花費相差甚遠，睇《金融時報》排名榜，都未必識揀，你哋既有津貼，上網慢慢揀便是。
一位讀者來信大罵左丁山引述一位作家說話：「只要中共一日在台上，上海永遠不能超越香港」，指左丁山係白癡，鸚鵡學舌。呢啲嘢無謂花唇舌辯論，二十年後自有分曉。賓架陳亦都睇到本欄嘅引述，佢來電話：「喂，有老友去到上海，聽到一個不是笑話的笑話，就係北京等二○○八，上海等二○一○，香港等二○○七，假如唔係嘅話，上海一定超越香港。」咁呀，好快啫，大家等吓啦。