郭晉安憑無綫劇集《戇夫成龍》中演出丁常旺一角而人氣急升，近期他除了接下兩場國內登台，進帳二十萬外，他更有四個廣告、三場登台、一部電影及斟洽中的剪綵工作，若事成的話，「阿旺」效應便可為他帶來逾三百萬的收入過肥年。
郭晉安在劇集《戇夫成龍》中扮演僅得八歲智商的丁常旺而令他人氣急升。
該劇的成功更令安仔名利雙收，早前安仔曾往湖南一間的士高登台，而下月中他又會到廣州作登台表演，兩次登台已令他進帳二十萬，除此之外，他斟洽中的工作更接到手軟，如果檔期能遷就的話，安仔更可穩袋逾三百萬過肥年。
現時安仔斟洽中的四個廣告，包括食品、西裝、休閒服及內地樓盤，而他正安排時間到內地的士高及美國登台，又有一香港首飾公司斟他擔任剪綵嘉賓，以及有一部電影正在洽商，由於安仔稍後會跟容祖兒開拍新劇《天使愛美麗》，故他正為工作度期而頭痛。
昨日記者致電安仔，對於獲不少廣告商青睞一事，他說：「梗係開心啦，但富貴由天，唔係有錢就搏晒命搵，都要睇吓對我同對產品有冇幫助，呢樣好緊要㗎，淨係掛住搵快錢，效果亦未必好，我會留番畀TVB同我傾。」
而「阿旺效應」至今為安仔帶來約二十萬收入，問他會否覺得賺得不夠？他說：「由收視公告到𠵱家得十日時間咋，畀啲時間我啦，邊有咁快㗎！」
《戇》劇於本周五將播出結局，故事講述阿旺並沒明確選擇宣萱或楊婉儀，三人只一起拖手話當年，安仔對結局安排則說：「呢樣係編審嘅情意結，佢覺得阿旺呢個人物唔會傷害任何人。阿旺揀邊個都會傷害另外嗰個，況且咁嘅結局會有人談論，我自己就覺得其實喺嗰個年代，揀晒兩個都冇所謂，最好公司搵個節目，同場加映呢一個完美結局：『我哋去洞房咯。』」
此外，安仔昨與宣萱及楊婉儀（Winnie）等，出席假鯉魚門廣場舉行之《戇》劇宣傳，吸引數百市民圍觀，其間安仔表示：「我前幾日去酒店攞衫，因為嗰度泊唔到車，我就同酒店嘅人講畀三分鐘時間我跑去攞，點知佢學阿旺講嘢同我講『三分鐘唔夠洞房喎！畀夠十分鐘你！』好搞笑，我希望《戇》劇可以去到平均收視四十點。」
而Winnie昨公開承認會於四月十七日，在中環大會堂與男友王瑞勳註冊結婚，對於準夫婿的前女友陳雅倫因聞他們結婚而說：「冤豬頭都有盟鼻菩薩」，Winnie說：「呢句嘢我都要問吓人，不過我都唔識陳雅倫，我同Simon（王瑞勳）唔會理佢講嘅嘢，結婚係件開心事，唔想因為啲無關痛癢嘅人而唔開心。」
採訪：朱芷瑩、陳梅香
攝影：何國豪
