我大口羅拉雖然已經唔係學生妹，但亦好明白學生面對考試嘅緊張心情。前日係日本舉行大學入學試嘅日子，二十一歲嘅水着女星真鍋薰，係橫濱國立大學嘅四年班學生，雖然佢唔使參加考試，但佢一早就同四個人組成咗「祈求考試及格啦啦隊」，喺自己讀緊間大學度向考生大派朱古力，為佢哋打氣。
真鍋薰除咗以師姐身份外，佢重係以Lotte食品嘅代言人身份派朱古力，派嘅當然係由Lotte製造嘅果仁朱古力。聽講啲朱古力能提高集中力同記憶力喎，咁咪好似食藥咁厲害？真係嚇親我大口羅拉。
啲朱古力就肯定冇嚇親啲考生，但唔少帶住緊張心情準備考試嘅學生，途中見到真鍋薰派朱古力就暈得一陣，希望佢哋唔會俾真鍋薰搞到乜都唔記得啦。
雖然真鍋薰唔使考入學試，但佢亦好擔心自己嘅前景，佢話：「我𠵱家好辛苦咁趕緊畢業論文，希望自己食多啲朱古力，唔使畢唔到業去做大學五年班學生（意指留級）啦！」而昨日有報道話廣末涼子自爆今年春天要留班，因為佢嘅出席率出奇咁差喎！