上周五，香港車壇可謂踏入2003年以來，至今最沉痛嘅一日，相信有唔少資深嘅汽車業人士及傳媒人，都好似亞Mark咁，一日裏面電話接個不停。皆因當日嘅早上，香港日本車界殿堂級人物，萬事得總裁莫Sir，將於稍後時間榮休嘅消息，經已獲得證實；與此同時，萬事得以營業及市場部掌舵人KennethAu為首嘅四名高層，亦同時向公司請辭。另方面，亞Mark聞得手握豐田及萬事得香港代理權嘅英之傑決策層，亦即時委任近期成豐田紅人嘅GaryCheung，調任掌管萬事得香港日常運作嘅總監。惟至今未得有關方面證實；然而，萬事得上下員工，卻變得惶恐終日，大有羣龍無首嘅感覺。亞Mark對此亦希望萬事得新管理層，盡早給員工有所交代。然而，上周中，香港車壇喺同一時間，又豈止有萬事得一椿大事發生，但亞Mark確實無力再擔起沉重嘅筆桿呢！
後註：亞Mark入行十多年，對比起萬事得總裁莫Sir，喺汽車界嘅年資，可謂小巫見大巫。猶記得印象中嘅莫Sir，胸襟闊大又豁達，對後輩更是愛護有加，任內最居功至偉，可算係給萬事得汽車進佔香港車壇前列位置，委實功不可沒；今趟莫Sir榮休，實係車壇損失。