美股真係企唔穩,杜指上周五跌過百點,納指跌3.3%。不過,港股已先行跌咗兩日,而且美國今晚跌冇市,恒指今日跌幅未必太大。
美股美金雙雙跌,金價油價就齊齊升。紐約油價呢兩日每桶升破33美元,刷新兩年高位,睇個勢重有一段去,石油股有新動力,相關Call輪可以順勢短炒。
中石油(857)除咗受惠於高油價,公司有新總裁上場,定下擴展大計,值得優先捧場。中石油有4件Call輪,其中9070雖有輕微負溢價,但十分價內,爆炸力有限,而且本月28日到期,時日無多,無謂考慮。
其餘3件,以9361最抵玩,現價0.135元,6月26日至到期,溢價只係2.8%,槓桿率11.9倍,相當夠彈力,一於揀佢。
另1隻石油股中海油(883),亦有4件Call輪。最多人玩嗰件係9299,數據亦相對較好,現價0.052元,溢價3.9%,槓桿率20倍,爆炸力強。不過,呢件只係玩到3月28日,扣埋農曆新年假期,好快就會歸入末日嗰類,溢價會縮得好快,故此記住上落車都要快。
其實油價升到呢個水平,雖然短線重有機會上,但隨時調整,玩石油輪只宜短線。
章盛