沙田噚日跑董事盃，八方本來諗住入場搵番多少過年，但因為太早起身去睇賽跑，於是下晝返咗屋企瞓覺，點知咁就錯失良機。
話說八方瞓瞓吓，馬圈中人電話到，佢話：「你哋《蘋果》威到盡啦，阿神童輝（本報馬經版主管）竟然貼中六T八Q，三T又中，真係乜T物T都畀佢中晒；贏咁多，幾時請飲茶呀？」
八方心諗，飲鬼飲馬咩，你請就差唔多。皆因馬會剛啱喺權威嘅超級品牌大獎中勇奪「娛樂組」大獎，重攞埋「超級品牌總冠軍」，黃至剛總裁親自去會展領獎，不知幾開心。因為呢個獎認同馬會公正不阿，又係「娛樂」，令到馬會上下都好興奮，你話係咪要賀一賀佢呢──夏佳理主席？
除咗攞獎，馬會重準備為「足球娛樂事業」大展拳腳，現正喺全球物色行政總裁，聽講出手好闊綽，當然要求亦好高。全港公司都緊縮，獨係馬會大把商機，羨煞旁人。
（圖）噚日董事盃由大熱門「電子麒麟」蟬聯，賽後由馬會主席夏佳理（右）頒獎畀馬主盧榮民（中）。
傳真︰2623-9278
電郵︰