小初記得舊年10月中，經紀陳話亨泰（197）有水源殺到，可以短炒，雖然隻股之後真係造好，但就唔夠鑊氣，但上星期隻股好似食咗藥咁，一條氣抽上去0.50元樓上。小初問經紀陳原因，佢承認早前所講嘅水源，近排先至到位，希望今次可以完成舊年嘅宏願。
亨泰上星期五表現夠氣勢，雖然只升4%，收0.52元，但成交股數有成2369萬股，金額達到1197萬元。
經紀陳話，做開消費品分銷嘅亨泰，早排提過想在上海買地，興建食品加工廠及水果分銷物流中心，所以唔排除有人想炒高股價，方便批股集資。
小初覺得，內地消費品概念唔算好吸引，但要炒作嘅話，最重要係炒家功夫同水源夠唔夠。經紀陳話，呢方面照計冇問題。
另外，被賭王四太追數嘅盈新遊樂（703），上周五臨收市，有一手成交將股價mark低39.39%，收0.10元。據年輕賓架講，傳聞有關人士四出搵融資界人士幫手，希望可以大事化小，小事化無。
慕容小初